Nantes lakah PSG an mualpho
Paris St-Germain tan Ligue 1 nomawi chu chiang tawh angin lang mah se Nantes laka tlawm erawh PSG tan mualphona a tling a, Inrinni zan khan Ligue 1-ah Nantes hi 3-1 in an ngam lo - Nantes tan Randal Kolo Muani, Quentin Merlin leh Ludovic Blas (penalty) ten goal khat ṭheuh an khung.
Neymar chuan PSG tana goal awm chhun khung mah se penalty hlahtu a ni tel a, 3-1 a nih laia an penalty hmuh hi Brazilian forward hian goal-ah chantir se result a danglam ngeiin a rinawm. October hnua a vawi khat nan Ligue 1-ah PSG an tlawm.
PSG tan Lionel Messi-a'n inkhel bul ṭan mah se hun harsaah a team a chhanhim thei bik lo a, Neymar goal khung tur a siamsak tih loh chu Argentine forward hian uanpui tur a nei tam lo - a career-a club match 800 a khelh tlinna goal nen a lawm thei lo.
Inrinni zan Ligue 1 inkhel ngaihven hlawh dangah Lyon an chak zo lo a, Lens nen 1-1 in an inhnehtawk - season thara Champions League khel phak turin an dinhmun a derthawng leh ta sawt.
En teh, Muani!
Champions League last 16-ah PSG-in Real Madrid an hneh a, an phur vanglai tak a ni - league-ah pawh point 10 chuang zeta hma an hruai chungin coach Mauricio Pochettino-a'n a player ṭhate a hahdamtir lo.
Argentine coach hian Messi, Neymar leh Kylian Mbappe te inkhel bul a ṭantir a, midfield-ah lah Marco Verratti te an la awm bawk avangin team pahnih khaikhin chi an ni lo - mahse, thilmak a thleng!
Messi, Neymar & Mbappe inkawp karah Nantes striker Kolo Muani hming a lang hmasa ber a, kum 23 mi striker hian minute lina lekah an mikhual team barakhaihin goal hmahruai a khung.
PSG an insiamṭha hman lo - minute 16-naah Merlin chuan Nantes goal hnihna a khung a, first half hun pek belhah Georginio Wijnaldum chuan a kuta ball a tawh fuh avangin penalty a chawi a, Blas chuan goal-ah a chantir.
Beiseina thamral
Chawlhlawk hman a nihin Nantes-in 3-0 in hma an hruai a, PSG tan chuan mualphona a tling. Mahse, second half ṭan aṭanga minute hnihna lekah PSG-in insiamṭhat an tum tih an pholang a, Neymar chuan si phurh a rawn sut ṭhen.
Minute 59-naah Dennis Appiah chuan Mbappe ti tluin penalty a chawi zui a, PSG an comeback ngei rinna a lian hman. Mahse, Neymar penalty pet a ṭha tawk lo a, Nantes keeper Alban Lafont chuan a dang - Ligue 1-a penalty a hmachhawn hnuhnung pali zinga pathum chu a dang thei!
Lafont hi PSG lakah pawh a khel ṭha takzet. Penalty a dan bakah 1-0 a nih lai leh 2-0 a nih hnuah Messi leh Mbappe khung ngei tura ngaih a dansak a, chawlhlawk hmaa Neymar chance duhawm a dante pawh a ṭha hle.
Julian Draxler-a'n hun tawp hnaih lamah chance nei leh mah se Lafont bawkin a dansak a, Mbappe-a'n yard sarih vel leka hla aṭanga a hlahte chu French striker tih atana mawi lo a ni.
Lyon chak zo lo
French club Lyon-in season tharah Champions League khelh ngei an duh a, mahse, an duhna hi khelmualah an lantir thei lo - Lens nen 1-1 in an inhnehtawk a, Champions League an hlat ta hle.
Lens tan Jonathan Clauss chuan minute 13-na lekah goal hmahruai a khung a, mikhual team Lyon tan Tino Kadewere chuan minute 44-naah a chhanglet. Mahse, Lyon-in goal dang an khung thei lo a, draw result-ah lungawi an zir.
Ligue 1 aṭangin pakhatna leh pahnihna chu Champions League group stage khel turin an tling dawn a, pathumnain Champions League third qualifying round an khel thung ang - panganain Europa League khelin pangana erawh Europa Conference League play-off khel tur an ni.
Lyon hian hnehna an chan zawh loh avangin pahnihna Marseille chu he thu buatsaih a nih lai hian point riatin an thlau mek a, match khatin an khel tam bawk - nizana Marseille result a zirin an inthlauhna erawh danglam leh thei a ni.