Kell Brook hmaah Amir Khan a tlawm

British boxing-a fight nghahhlelhawm ber pawl Kell Brook vs Amir Khan chu nimin zing khan neih a ni ta a, round ruknaah Brook chuan technical knockout hmangin Amir Khan hi a hneh.

Manchester Arena-a entu khat vek hmaah Khan-a'n bul a ṭan ṭha a, hman ang tho khan a la hnek rang reng - mahse, Brook a inveng thiam a, a hunah tak a hnek chhuak ṭhin.

Round khatna aṭanga round lina thlengin Amir Khan-a'n huaisen takin a nawr a, mahse, Brook a thiam ve tlat - round ngana aṭangin Brook-a'n inhnek a thunun ṭan a, round rukna a thlen meuh chuan na tak taka Amir Khan a hnek avangin referee Victor Loughlin a inrawlh a, technical knockout hmangin Brook a chak.

Brook chuan, "Amir Khan ka hneh tak avangin hahdam takin ka awm thei tawh ang. Boxing hi nuam ka ti a, ka theihna tak tak kha ka nei let lehah ka inngai. Mahse, ka chhungte thurawn ngaihthlak tel a ṭul a, tun atan chuan ka lo kir e," a ti a, a rilruah chawlh a awm thu a sawi.

Mahse, 2014-2017 chhunga IBF welterweight title lo kawl tawh boxer chuan, "Chawlh chu rilruah a awm a, mahse, Chris Eubank Jr. hi ka ngainat zawng a nih loh avangin ka fight leh duh mai thei. Fight tur dik min pek theih chuan ka fight leh ang," a ti.

Kum 35 mi Khan chuan, "Vawi 40 fight ka hmachhawn tawh a, a tam tawh hle. World title pahnih ka hlawh chhuak tawh a, USA-ah ka in fight tawh a, ka chhungte nen ka hma hun kan sawi ang - ka career hi a tawp hnai ve tawh a ni.

"A hma ang khan boxing hi nuam ka ti tawh lo. Tun hma chuan ring chhunga ka luhin ka phur em em zel a, kha phurna kha ka nei tawh lo. Ka ni deuh ruih tawh a, ka chawlh a hun tawh a ni mahna," a ti.

Amir Khan hian vawi 40 fight-a hmachhawnah vawi 34 hnehna a chang a, vawi ruk a tlawm thung - WBA (2009 - 2012) leh IBF (2011) welterweight title kawl tawhin

WBC Silver welterweight (2014-2016) title a kawl tawh bawk.