F1 driver ropui Schumacher Vs Hamilton

Formula 1 ngainatute tan chuan Michael Schumacher hi legend a ni a, basketball-a Michael Jordan leh tennis-a Roger Federer te nen huang khatah an awmah a ngaih theih.

Jordan-a ropuina chu LeBron James-a'n a hnaih zel a, Federer-a Grand Slam record pawh Rafael Nadal-a'n a rawn nihrual. F1-ah pawh Schumacher-a record hi Lewis Hamilton-a'n a nihrual a, a khum ngei a rinawm bawk.

Schumacher-a'n kum 2004-a F1 a champion hnuhnun ber khan kum 35 mi a ni a, Hamilton pawh hi kum 35 mi tho ni mah se British driver hian inelna a thunun danah a la champion zel a beiseiawm hle.

Mercedes driver Hamilton chuan, "Ka naupan lai khan vawi khat champion ringawt pawh hi duhthusam a ni a, thil theih loh ang hialah ka ngai ṭhin. Tunah erawh chuan ni duhawm tak ka thleng a, tun hun thleng tur hian hun harsa tam tak ka paltlang a ni. Bul ṭan ang maiah ka la inngai a, a mak ang reng hle. Inelna hmachhawn zel turin ka inpeih bawk," tiin champion chhunzawm zel a tum thu a sawi.

German driver Schumacher hian Ferrari-ah hming a chher a, kum 2006 khan F1 car ṭha bera ngaih Ferrari driver aṭangin a chawl. Amaherawhchu kum 2010 khan Mercedes-ah a lut leh a, F1 luhchilh leh mah se season thum chhunga a nih san berah pariatna chauh a ni.

Schumacher hi 2000 aṭanga 2004 thleng kha a zawnin season nga a champion a, Hamilton hi 2017 aṭang khan season li chhung a zawnin a champion ve tawh bawk. British driver hi 2021-ah a champion leh theih chuan hemi kawngah pawh hian Schumacher-a record a nih rual ang a, overall champion-ah a  khum bawk ang.

Kum 35 mi Hamilton hi race vawi 94-ah pakhatna a ni tawh a, vawi 97-ah pole position a chang tawh a, vawi 163 zet podium-ah a ding pha a, driver ropui tak a ni. Turkish Grand Prix-a hnehna a chan zawh chiah hian a elpui Sebastian Vettel chu lawmpuitu hmasa ber a ni.