Djokovic-a'n a thlir thui

Novak Djokovic chuan tennis chawlhsan mai a la tum lo hle, tun hnai khan 2024 Paris Olympic-ah gold medal lak a tum thu a sawi chhuak. Infiamna khawmpui lianah hian singles huangah a la champion miah lo a ni.

Grand Slam vawi 20 champion tawh Djokovic hi kum 34 mi a ni tawh, nikum khan Tokyo Olympic-ah gold medal lak ngei tum mah se, a kalkawngah Alexander Zverev a ngam lo. Olympic an neih leh meuh chuan kum 36 a tling tawh dawn.

Serbian star Djokovic chuan, "Olympic medal lak hi chu ka duhthusam pakhat a ni reng, a bik takin gold medal lak ka chak leh zual. Tokyo Olympic-a Zverev nen kan inkhelh pawh kha tun thleng hian ka la ngaihtuah let nasa.

"Mimal hlawhtlinna hi a pawimawh a, chutiang ang bawk chuan ram tana hlawhtlinna chan hi engtik lai pawha ka duh leh chak a ni reng," a ti. Novak hi ram hmangaihtu tia hriat ṭhin a ni a, a rilru a la danglam lo.

Tennis season kal laia Grand Slam hmasa ber Australian Open-ah khan Djokovic hi a inlan thei lo, a inlan loh lai hian a elpui Rafael Nadal a champion thung. Major tournament pahnihna French Open-ah chuan a inlan theih ve tawh a beisei awm.

Mahse, inelna lian thlengtu France, UK leh United States ten hripui leng chungchanga mikhual thlen dan an la ti danglam thei reng. Vaccine la duh lo Djokovic hian invenna damdawi lak ai chuan inkhelh loh mai a duh zawk a, a hma hun hi a chiang lo mek a ni.