Madrid khaw club an chak

Inrinni zan La Liga inkhelah Real Madrid leh Atletico Madrid an chak ve ve a, goal thum an khung ve ve a, goal an chhuah lo ve ve bawk!

La Liga hmahruaitu Real Madrid hian 3-0 in Deportivo Alavés an hneh a, Paris Saint-Germain laka an tlawm an theihnghilh tawh - Marco Asensio, Vinicius Jr leh Karim Benzema ten goal khat ṭheuh an khung.

Real Madrid-in hnehna an chan avangin La Liga-ah hma an hruai chhunzawm zel a, an hnuai chiaha awm Sevilla aiin point sarihin an sang - nizan khan Sevilla hi an inkhel a, an result kan hre hman lo.

Atletico Madrid chuan khualmualah 3-0 in Osasuna an hneh ve bawk a, João Félix, Luis Suárez leh Ángel Correa ten goal khat ṭheuh an khung - Champions League khelh an beisei ve zel.

A tawpah Real
Real Madrid-in first half chhungin goal an khung thei lo a, PSG laka tlawm hlim team hi an chak zawh loh ngat chuan La Liga nomawi an khawih thuak tawha an ngaih chu a derthawng thei bawk.

Santiago Bernabeu-a inkhel entu Real fan-te pawh an team khelh danah an lungawi lo a, thawm hmangin an lawm lohna an lantir. Mahse, minute 63-naah Asensio chuan fan-te chu an duh a hmuhtir a, mawi zetin goal a rawn khung.

Asensio hian a hmuia a kut dah chungin fan-te chu an team thlawp turin a ti a, Real-in thiltih hmangin fans an chhang chhunzawm bawk - Vinícius chuan minute 80-naah an goal hnihna a khung.

Real-in an duhtawk lo - Benzema-a'n goal khungna chance a hlah hnuah a vanduai nawn tawh lo a, Rodrygo penalty hlawhchhuah chu hun pek belhah goal-ah a chantir a, tun season-a goal 25-a khungna chiah a ni.

Hei le, Atletico
Atletico Madrid-in tun season-ah beisei an phak loh avangin coach Diego Simeone ban tumna thawm thlengin a ri hman a, mahse, khawthlang media lama he titi a darh hnua an result hriat hmasak ber chu Atletico-in goal thum an khung thu a ni.

Simeone enkawl team hian kar hmasa khan table mawngphah luahtu Levante chu 1-0 in an ngam lo a, mahse, an insiamṭha rang hle - minute thumna lekah Joao Felix chuan goal hmahruai a khung a, goal dang erawh a lut lawk lo.

Second half-ah Suarez leh Correa ten an khung chhunzawm ve leh a, mualneitu Osasuna-in a chhanletna tur an neih loh avangin an tlawm chiang hle. Atletico-in 3-0 in hnehna an chang a, Champions League beiseina an chhem nung zel.

Kum 22 mi Félix-a'n Atletico tan inelna hrang hranga a match 100-na a khel chiah a, July 2019-a Benfica aṭanga pound maktaduai 113-a an lei forward hian match 100-ah hian goal 23 khung tawhin assist vawi 14 a nei.