Suaka Cricket Ground tih changtlun tum

Cricket Association of Mizoram honorary secretary Mamon Majumdar chuan BCCI president Sourav Ganguly leh secretary Jay Shah te hnenah Mizoram mamawh hrang hrang a thlen a, chung zingah chuan Suaka Cricket Ground tih changtlun tumna pawh a tel.

Indian Premier League hmawr bawknaah CAM secretary hian BCCI hruaitu lute hi titipuiin, BCCI president leh secretary-te chuan Mizoram chu inkhelhna atana hmun hma ṭha tak an siamsak tur thu a hrilh. 

Stadium thar sak tur chungchang pawh president chuan a thuphungin a pawm thu a hrilh a, Suaka Cricket Ground-a Indoor sakna tur chungchang pawh thuneitu lamin estimate leh design-te an buatsaih ang a, December 2021 hmaa tihchhuah hman an inbeisei thu a lo hrilh a ni. 

CAM secretary hian Mizoram District Cricket Association hrang hranga ground siam tura a ngenna pawh an ngaihtuah tur thu a hrilh. SCG ground khawih mek pawh zawh a ni tawh a, BCCI President leh Secretary-te chuan en tura Mizoram rawn kal an chak thu pawh an sawi bawk.

BCCI President leh Secretary-te chuan CAM Secretary chu Mizoram bakah NE state dangte an tlawh theih dan tur ruahmanna siam turin an ti. CAM Secretary hian ruahmanna siamin a thawn leh ang a, hemi hnu hian BCCI hotute'n Mizoram an tlawh theih dan tur ngaihtuah a ni ang.

CAM Secretary hian BCCI president leh secretary-te bakah, treasurer-te hnenah 2020-2021 season atana inbuatsaihna tur leh mamawha hman tur sum tichhuak thuai turin a ngen nghal bawk.