Novak Djokovic inlan zan

ATP Finals 2020 chu nizan aṭang khan O2 Arena, London-ah khelh ṭan a ni a, zanin dar 7:30 hian Novak Djokovic chuan a group match hmasa ber atan Diego Schwartzman a hmachhawn ang.

World number 1 Djokovic hian season tir khan Australian Open nomawi a chawi, hri leng vangin tournament dang erawh a khel chhunzawm mumal thei lo. US Open khel mah se a thil tih dik loh vangin hnawl a ni.

Vienna Open-ah Novak inlan chhunzawm mah se beisei loh takin quarterfinal-ah Lorenzo Sonego a ngam lo. London khawpuiah hian champion tura rinkai ber chu a ni a, chutih rualin hard court-ah ngei pawh hneh theih a nihzia a lang chiang.

Djokovic khingpui tur Schwartzman hi world number 9 ni mah se, hliam vanga Roger Federer a inlan theih loh avangin a thiam pariat inelna zingah a tel thei - a vawi khat nan ATP Finals a khel dawn.

Argentine tlangval hian Rome khawpuiah final a thleng a, French Open khelh zawh takah khan semifinal inhlangkai mah se nomawi a chawi lo. Roland Garros a khelh dan thlir erawh chuan player lian dang pawh hneh thei a ni tih a lang.

Player pahnih hi tun hmain vawi nga an inhmachhawn tawh, player ṭha zawk Djokovic-a'n hnehna a chang vek - zaninah pawh rinkai zawk a ni ang. An intawn hnuhnung ber chu Italian final kha niin, straight set-in chak mah se awlsam takin a chak bik lo.

Kum 33 mi Djokovic chuan, "World number 1 ni chungin season ka khar dawn tih a chiang tawh a, chumi hnua inelna hmachhawn chu a boruak a danglam dawn. Match zawng zawngah hnehna chan ka tum dawn," a ti. Nomawi a chawi a nih chuan Federer (6 titles) nih rualin record nei ṭha ber an ni ang.

Zan dar 1:30-ah Alexander Zverev leh Daniil Medvedev an inhmachhawn thung dawn, player pahnih hi inkhel tawk viau tura ngaih an ni. An intawn tawhnaah German tlangval Zverev-a'n vawi nga hnehna changin ṭum hnih a chak lo thung.

ATP Finals-ah hian tennis ranking sang zual pariat an inel ṭhin, group pahnihah ṭhen hran niin an inkhelh kual vek hnuah a sang pahnih zelin semifinal an lut ang. Inelna hi tun hnai season 10 chhung chu London khawpuiah neih a ni a, season thar aṭang chuan Italy khawpui pakhat Turin lamah an khel ang.