Serchhip-ah pawh Chhinga Veng tho

Mc Dowell's No. 1 Mizoram Premier League Season 7 round 7 chu Serchhipah khelh a ni a, Inrinni tlaia match hnuhnung berah Chhinga Vengin Lalrammawia goal hmangin Chanmari FC 1-0 in an hneh a, hmahruaitu dinhmun an sawhnghet.

Chhingcows hian match sarih an khelh aṭangin point 19 an hlawh chhuak a, semifinal thlen pui tham point an hlawh chhuak ringawt lo a, Serchhip mipui hmaah team ṭha ber an nih zia an pholang.

Inpuahchahna ṭha a dang
Chhinga Vengin Ningani tlaiah training ṭha tak an nei tawh a, an duh ang drill an nei thei a, Zirtawpniah hahdamna hun ṭha an nei tawh.

Chanmari erawh Zirtawpni tlaiah Ser-chhip thlengin tlai lamah inelna tur hmun an tlawh zawk a, inkhelh hma hauhin Chhinga Veng dinhmun a ṭha zawk.

Khelmual pawn boruak
Chanmari FC-in Lammuala chakna goal ṭum hnih khung tawh Serchhip tlangval Mark Zothanpuia an kawl a, Hriangtlang tlangval Vanlalbiaa Changte an kawl bawk avangin khawtual mipui ṭan an hlawh zawk.

Amaherawhchu, Serchhip mipui zingah pawh Chhinga Veng ṭantu an awm tho a, FC Serchhip Kawnpui chuan Chhingcows tan banner siamin 'Malin in awm lo' tih an tar ve kulh bawk. Hei bakah hian Aizawl aṭangin Chhinga Veng ṭan tura zin an tam zawk.

An thiam e
"Chhinga Veng leh Chanmari inkhel hi kan en châk ber a ni sa hrim hrim," tiin inkhel entu zinga mi chuan Vanglaini a hrilh a, an duh ang chu hlui sakin an awm.

Chhingcows-in game rang an khel a, ṭantirh lamah passing mawi tak piah lama Chanmari tlarhnung an ṭhiat leh zeuh ṭhin chuan mipui mit a ti tlai a. Midfielder Lalrinchhana'n box chhunga mawi taka ball a lak thlak hnua a ball pek Lalsawmzela khung loh te chu chance ṭha zinga mi a ni a, tlarhma chhuanvawr MS Dawngliana pawhin a khung thei bik lo.

Chanmari lam pawhin Chhinga Veng tlarhnung tan buaina an siam ve tho a, khawtual mipui ṭan rawn Mark-a ball pek ṭha zet chu goal nga khung tawhtu Lalnunzama'n goal-ah a chantir thei bik lo.

A hming chu 'Rammawia'
First half-ah goal a lut lo a, second half minute 74-naah Sawleng tlangval Lalrammawia'n Lalrammawia leh Sawmzela te thawhrah sengin chakna goal a khung.

Rammawia hian Serchhip zin hmaa Electric Veng an hneh ṭum pawhin a pet goal tawh a, goal khung lawma mipui lama a tlan phei laia tualchhung football hrechiangtute hmuh hmaih loh tur chu kum hnih liam taa amah auh eltute lamah a pet goal tih hi a ni.

MPL5-a Chanmari an champion ṭum khan Chanmari mipui chuan Rammawia hi an jersey ha tura ṭha tawk loah an ngai a, amaherawhchu MPL6-ah a chenna Bethlehem Vengthlang tan khel leh phawtin tunah chuan Chhingcows tan khelin a club hlui lamah goal pawimawh a khung.

Fuh leh fuh lo!
Chanmari FC tan Zama'n match hmasa pangaah goal a khung vek a, Serchhip-ah Chanmari rawlthar hi khel chhe hran lo mah se second half ṭan chiahah MC Malsawmzuala'n a thlak. Chanmarians goal nawr kawnga hlauhawm ber pakhat lakchhuah a nih avang hian Chhinga Veng tlarhnung an lawm a rinawm.

CFC coach Lalruatliana Sailo chuan thutlukna huaisen siamin MPL7-a ṭum hnih hnawhchhuah ni tawh C. Lalrosanga chu Serchhip-ah a hruai tel lo a, an chak zawh leh tak si loah chuan thutlukna ṭha ber niin a lang ta lo.

Chhinga Vengin tlarhma lama an player pawimawh Lalremruata leh Lalrammuanpuia te an chhawr thei lo a, hei vang hian Electric Veng nena an khel tur thlir lawk nan hmangin player che rang rual Dawngtea, Lalmuansanga, Lalrinchhana bakah tawnhriat nei tlem zawk Sawmzela leh C. Beithalo te enchhin nan an hmang a, point thum an hmuh avangin thutlukna ṭhaah a ngaih theih.

Engtin zel?
Chanmari FC-in match sarih khelhah point 10 an hlawh chhuak a, an hnuai chiaha awm Mizoram Police-in point kua an hmuh tawh bawk avangin pressure an ngah ṭan ta. MPL5 champion hian round 8-ah Police hi an hmachhawn nghal dawn a, MPL semifinal lut tur zawnna tura inkhel pawimawh tur ber zinga mi a ni nghal dawn.

Table chung lamah Chhinga Veng an nuam sa a, round 8-ah tho an hnuai chiaha awm Electric Veng an hmachhawn dawn a, hmahruaitu inchuhna inkhel a nih avangin sawi nep theih a ni lo ang.