Mipui 100 rual chakpuitu Electric Veng

Lammuala Electric Veng chakna chu an veng mipui a ni a, Serchhip-a MPL club thar chakna pawh an veng mipui tho a ni. Inrinni khan EFC hian Ramhlun North chu 3-2 in an hneh , Complex Field-ah Electric mipui thawm a ṭha hle.

Mizoram Premier League Season 7-ah Electric Veng hi kai thar chauh ni mah se league round chanve khelh zawhah pahnihna dinhmun an hauh pha a, match sarihah point 19 hmuin semifinal lut turin an dinhmun a ṭha.

Hei hian nghawng lian tak a nei dawn, EFC hian semifinal an lut a nih chuan club lian pathum Aizawl FC, Chanmari FC leh Mizoram Police aṭangin pakhatin knockout stage an lut lo ang.

Goal sarih

Ramhlun North-in bul ṭan ṭha zawkin captain Lalliansanga hmangin crossbar pet per mah se Electric Vengin goal an khung hmasa zawk. Ramhlun North keeper R. Lalnunmawia tan mangchhia a ni ber a, a ball thlauh vangin minute 7-na lekah Electric Veng winger Lalrintluanga'n goal a khung a, minute 36-naah a man per vangin David Lalchhuanawma'n a khung leh bawk.

Second half ṭan chiahah John Ampong penalty hmangin Ramhlun North-in siphurh sut ṭhen mah se an lawm chhung a rei lo. Minute 59-naah David-a'n EFC goal thumna ni turin Ramhlunchhunga ball pek chu goal-ah a chantir a, minute 65-naah Ramhlun North substitute Bamba Musah chu hnawhchhuah a nih leh bawk avangin MPL kaithar dinhmun a ṭha.

Amaherawhchu Ramhlun North-in an foreigner Waheed Adekunle an dahlut leh a, point hmuh tuma an nawr let avangin Electric Veng an talbuai. Minute 85-naah player thar leh khel ṭha Lalremruata goal hmangin Ramhlun North-in beiseina thar an nei a, Electric Veng an ṭang tluan hram.

Mipui 100 rual!

Serchhip pana Electric Veng mipui kal zat hi engzat chiah nge hriat loh mah se 100 chuang zet an ni a, result thlak danglamtu an ni.

Ramhlun North keeper Lalnunmawia'n minute sarihna lekah a tisual a, keeper bakah tlarhnung lamin inrintawkna an hloh nan an thawm ring tak hmangin an au zam hneh hle. Goal hnihna hi an au chhuah tihin a sawi theih a, Ramhlun North tlarhnung an au nghing bawk.

Minute 65-naah Bamba Musah chu a ball khalh paha EFC captain Isak Vanlalpeka nghawk palh/luih vangin hnawhchhuah a ni a, referee thutluknaah hian Electric Veng mipui thawmin nghawng a nei niin a lang. Ramhlun North ṭantute chuan referee thutlukna pawm harsa an ti khawp ang.

EFC ṭantu zinga mi chuan, "Mahni sum seng a, mahni lirthei ngei a, zinchhuah chu a nawm dan a dang a. Hnehna kan chan bawk avangin kan thil tawn hi suma lei theih a ni lo," tiin tualchhung football-a an thil tawn a ngaihhlut zia Vanglaini a hrilh.