Hliam nen Salah a haw

Liverpool forward Mohamed Salah chu inter-national friendly khel tura Egypt tana a fehchhuahna lamah a inhliam a, kum 26 mi forward hi hliam nei chungin Anfield lamah a haw.

Salah hian Swaziland laka 4-1 a an chakna inkhelah corner aṭangin 'direct'-in goal ropui a khung a, mahse goal a khung hnuah hliam vangin lakchhuah a ngai a ni.

Egypt assistant coach Hany Ramzy chuan, "Kan team doctor-in min hrilh dan chuan Salah hian a tihrawlah hliam a tuar a, ngaihtuahawm ni lo turah kan ngai," a ti.

He thu buatsaih a nih lai hian Liverpool chuan an forward chungchangah thuchhuah siam an la nei lo a, Salah hian engtia rei nge chawlh a mamawh dawn a la hriat loh. Reds hian Inrinniah Huddersfield chu Premier League match an khelhpui dawn.

Salah hian season hmasa khan Liverpool tan season duhawm tak hmangin goal 44 khung a, tun season-ah erawh club tana a match hnuhnung pali-ah goal a khung tawh lo.