Siami tan Youth Olympic medal a chiang

Youth Olympic Games 2018 neih mekah India mipa leh hmeichhe hockey team chuan final an lut. Nizan khan Buenos Aires-ah India hmeichhe team chuan inelna thlengtu Argentina an hmachhawn a, he thu a chhuah meuh chuan Mizo nula Lalremsiami Hmar-in gold medal emaw silver medal a awrh tawh ang.

Siami telna India team hian Inrinni zan khan semifinal khelin, ram ṭhenawm China chu 3-0 in an hneh. India tan hian Mumtaz Khan (1'), Reet (5') leh Lalremsiami (13') ten goal khat ṭheuh an khung. Nizan zanlai khan a thlengtu Argentina nen final an khel zui a, he thu buatsaih lai hian result kan hre hman lo.

Argentina khawpui Buenos Aires-a inelna neih laiah Kolasib tleirawl Siami a khel ṭha thei hle, match zawng zawngah inlan vekin, game sarih a khelh aṭangin goal kua a khung tawh. Pool match bika Uruguay an hnehna goal hnih phei chu a khung ve ve niin, group stage-a Argentina an hneh loh ṭum erawhin a khung lo.

Mizo zinga Asian Games-a medal la hmasa ber Siami chuan, "Inbuatsaihna kan nei ṭha a, champion thei kan ni," tiin hlawhtlinna chang thei turin an thawhrim thu Vanglaini a hrilh a, an thlen chin hi a chhe lo hle.

Mipa inelna lamah pawh India tlangval ten a thlengtu Argentina chu 3-1 in an hneh, anni hian Malaysia nen gold medal an inchuh zui ve thung. Nimin tlai thleng kha chuan India hian Youth Olympic neih mekah hian medal pariat la tawhin table-ah pawh pariatna an ni mek a, hockey aṭang hian medal pahnih chu an dawn belh ngei dawn a ni.