India leh China an inhnehtawk

AFC Asian Cup khel tura inbuatsaih India-in result duhawm an rawn hawn a, Inrinnia Suzhou khawpuia China nen an inkhelah goal khung loin an inhnehtawk.

Team pahnih dinhmun a inthlauh avangin India tan chak beisei ngam chi a ni lo a, si an phurh tam loh chuan an vannei ang tih chu an innghahna a ni.

Mahse, Mizo tlangval Jeje Lalpekhlua telna India team-in huaisen takin an bei a, anmahni mualah ngei China an inhnehtawkpui. Asian Cup khelh tur atan India fan-ten beiseina an nei sang sawt ang.

Italy tana World Cup nomawi lo chawi tawh, China coach Marcelo Lippi chuan, "Football hi chu a chang chuan hriatthiam a harsa ṭhin a ni," tiin an beisei loh result an hmuh thu a sawi.

Player inlan

Team pahnihin 4-2-3-1 formation an hmang a, India coach Stephen Constantine-a'n Intercontinental Cup lama a player rinte bawk a ring nawn.

Kum 20 mi Anirudh Thapa chu midfield laiah tlarhnung pui turin Pronay Halder nen dah an ni a, midfielder pahnih hi Chinese midfielder-ten hmun awl an neih loh nan an thawkrim a, fak an phu hle.

Mual sir aṭanga nawr turin Udanta Singh leh Halicharan Narzary dah an ni a, tlarhmaah Jeje chu mal tlatin Mizo tlangval thlawp tur hian a hnung chiahah Sunil Chhetri a awm.

India-in goal nawr ai mahin a ven lam thupuiah an neih avangin tlarhma tan lansarhna chance a tam lo. Hetichung hian Jeje leh Chhetri ten 'half chance' tia sawi theih an nei ve ve a, an hun neih an chhawr thei lo.

The Wall

India-in draw result an hlawhchhuah theih avanga lawmthu sawina tur an nei a nih chuan tlarhnung lama ding te an ni ang. Tlarhnung laiah captain armband hrentir Sandesh Jhingan a khel ṭha takzet a, a dinpui Narayan Das, Pritam Kotal leh Subhasish Bose te an khel ṭha viau bawk.

Constantine chuan Jhingan fakin, "Huaisen taka bei ṭhin mi a ni a, a theihna zawng zawng kha a hlan a ni," tiin a defender khelh ṭhatna a hai lo.

Sawi hmaih thiang lo chu Gurpreet Singh Sandhu a ni. Kum 26 mi goalkeeper hian vawi tam India a chhanhim a, China tlarhma ti beidawngtu a ni. Punjabi keeper hian inkhel ṭantir lama Gao Lin hun ṭha neih ṭha zeta a dan bakah vawi tam save a nei.

Constantine chuan, "Gurpreet hian hmasawn zel turin theihna sang tak a nei. Talent nei ṭha bik a ni a, kan result hlawhchhuah nan khan a thlawhhlawk a ni," a ti.

Chance nei ve ve!

Team pahnih inkhelhna statistics thlirkir chuan China an chungnung zawk tih a lang chiang a, mahse inkhel pumpui thlir erawhin team pahnih hi chak thei ve ve an ni.

Inkhel ṭantir lamah China-in nawr viau mah se India an insiamṭha hret hret a, passing game mawi tak hmuh tur a awm ve leh zeuh ṭhin. Chhetri, Halder leh Thapa-ten ṭha zeta ball an inpek kual hnuah Kotal-a tan goal khungna remchang an siamsak a, mahse Indian defender shot hi Chinese goalkeeper Yan Junling chuan ṭha zetin a dan sak.

India vanneihna erawh sawi hmaih a thiang lo. Gurpreet-a'n vawi tam a dan bakah Wu Lei-a pet goal ngei tur nia lang chuan woodwork a per a, Blue Tigers fan-te thin phu a rang hman hle.

Injury time-ah India-in chance duhawm an nei leh a, defender pahnih ven kara talput Farukh Choudhary hun ṭha chu Junling bawkin a dan sak. Goal lut loin inkhel a tawp a, a lawm zawk chu India an ni.

China thukhawchang

Serie A, Champions League leh World Cup nomawi chawi tawh coach-in mahni mualah India a hneh zo lo a, khawvela coach hlawh hnem ber ni bawk Marcelo Lippi tan result duhawm a ni lo.

Italian coach chuan, "CSL-in a tawp lam a hnaih tawh avangin club tan player-ten rilru an seng hnem a, friendly match lamah an rilru an pe tawk lo a ni," tiin result a sawifiah a, "Thutlukna dang siam a la ṭul dawn a, Asian Cup-ah chuan kan danglam ang," tiin squad a siksawi tur thu a sawi zui.

SAFF Championship final-ah India U23-in Maldives an hneh lo a, Lippi chuan hemi avanga thutlukna a siam sual thu a sawi. Italian coach chuan, "Tun hnaiah India an khel ṭha tih ka hria a, mahse Maldives lakah 1-2 in an tlawm tih pawh ka hria. A chang chuan football hi sawi lawk a harsa ṭhin a ni," a ti.

Chinese striker tawnhriat ngah Gao Lin chuan, "Kan khelmualah fans tam tak neichungin kan khel a, hetiangah chuan chak kan beisei a ni," tiin a lawm lo hle.