Ramos-a'n penalty vawi hnih a hlah

Inrinni zan khan Nations League-ah Spain-in Switzerland an tlawh a, La Roja captain Sergio Ramos-a'n penalty vawi hnih a hlah avangin 1-1 in an inhnehtawk. League A group 4-ah Luis Enrique hoten point khat chauh an hlawhchhuah avangin Ukraine hnehtu Germany chu pakhatnaah an awm.

Red Bull Arena Leipzig-ah Ukraine-in Roman Yaremchuk hmangin khung hmasa mah se team ṭha zawk Germany-in Leroy Sane leh Timo Werner goal hnih hmangin an chhanglet a, Joachim Low hoten 3-1 in hnehna an chang.

St Jakob-Park-ah Spain an lenglut a, Enrique hoten dinhmun ṭhaa ding turin point thum hlawhchhuah an mamawh. Amaherawhchu Switzerland-in Remo Freuler hmangin minute 26-naah an khung hmasa zawk.

Spain-in siphurh sut tumin an nawr let a, Enrique hote hian inkhel pawh thunun zui mah se tun hma an pha ta lo - danglamna thlen thei player an nei tlem tawh!

Real Madrid defender Sergio Ramos-a'n Rodriguez kut a tauh per vanga penalty hmuh chu pet nghalin keeper Yann Sommer-a'n minute 57-naah a dansak. 

Ramos-a'n a tihsual siam-ṭhatna hun ṭha a nei a, minute 80-naah substitute Alvaro Morata penalty hlawhchhuah a pet leh. Spain captain hian a petna ngaiah bawk, a hmaa aia na loin a pet a, keeper Sommer-a'n a man chat. 

Switzerland-in penalty chawitu defender Nico Elvedi an chan a, player 10-a khelin an ṭang tluan thei lo. Minute 89-naah Spurs defender Sergio Reguilon cross ball ṭha zet chu Villarreal striker Gerard Moreno-a'n Spain siphurh sut nan a khung a, goal dang a luh belh lo.

Sergio Ramos chu ram tan vawi 177 a inlanna chiah a ni a, ram tana khelh tam lamah Italy goalkeeper Gianluigi Buffon a lehpel chiah. Spain defender chungah hian vawi 178 khel tawh Bader Al-Mutawa (Kuwait) leh Mohamed Al-Deayea (Saudi Arabia), vawi 179 khel tawh Ahmed Mubarak (Oman) leh vawi 184 inlan tawh Ahmed Hassan (Egypt) te chauh an awm tawh avangin Ramos hian record a hnaih hle.

Ramos hi March 26, 2005 khan ram tan a inlan ṭan a, Spain-ah phei chuan tuna khel laiah Sergio Busquets (120) nen ram tan an khel hnem fal hle. Real Madrid captain hian Spain tan goal 23 a khung a, tuna ram tana la khel lai zingah defender ni chungin goal a khung tam ber. 

Luis Enrique-a'n Manchester United keeper David de Gea chu bench-ah a dah a, Athletic Bilbao shotstopper Unai Simon a thlang zawk. Inkhelh banah Enrique chuan, "Ka sawi nawn leh ang. Keeper pathum ka nei a, pali leh panga pawh an ni hial zawk ang. An vaiin ka ring vek," tiin a sawi.

Spain goal chhuah danah Unai Simon-a'n tihsuah a nei lo a, chutihrualin ṭum khat langsar taka a tihsual avangin goal hnih an chhuah teuh hle. Enrique chuan, "Ka thil hmuhah ka lungawi. Team ṭha zawk kan ni a, chak kan phu, kan vanduai a ni," tiin a player-te a chhan na hle.