Henry-a'n Monaco enkawl dawn

Arsenal striker hlui Thierry Henry chuan ama pualin team a enkawl ve dawn ta, a chawr chhuahna AS Monaco chuan 2021 June thla thleng an manager ni turin an lalut.

Kum 41 mi Henry hian inkhelh a chawlhsan hnuah team enkawl turin a inzir chhunzawm a, Belgium assistant manager hna thawkin World Cup neih zawh takah khan pathumna an nihpui. Tunah chuan player a nih laia professional career a ṭanna hmunah bawk coach puitling ni turin bul a ṭan leh dawn a ni.

Gunners tana goal khung hnem ber Henry chuan, "A lan dan chuan managerial career bul ka ṭanna tur ni maiin ka hria, Monaco hi ka thinlungah a awm reng ṭhin a, an hnen pan theihna hun ṭha ka nei hi ka lawm hle. Chutihrualin tunah chuan hna hautak a inṭan dawn a ni," tiin a sawi.

France international hlui Henry hian 1997 khan Monaco hi Ligue 1 nomawi a chawipui a, an ram club a champion pui zawh hnu hian Juventus, Arsenal, Barcelona leh New York Red Bulls tan a khel zui leh. Tun hnaiah Aston Villa enkawl tur anga sawi pawh a ni hman; Henry chuan, "Sawmna duhawm tak tak ka hmu nual," a ti.

Henry tan a hna thar hi a awlsam dawn lo, Monaco hian 2017-a league nomawi chawipuitu Leonardo Jardim chu kar hmasa khan an ban. Portuguese manager hian season bul a ṭan fuh pui lo a, match kua an khelh tawhah 18-na an ni mek.

Monaco leh Arsenal tana a khelh laia Henry enkawltu Arsene Wenger chuan, "Duhthlanna dik a ni, a fin bakah football hi a hrechiang a, hlawhtlinna chang turin ka duhsak," a ti. Henry hnuaia an match hmasa ber atan October 1 hian Strasbourg an lenchilh ang.

Monaco chief executive Vadim Vasilyev chuan, "Thierry hian football a hre thuk a, a inpekna leh tawnhriat ṭha tak a neih te, club a hmangaihna te kan thlir hian kan tana ṭha turah kan ngai. Ani kaihhruaina hnuaia hna thawh kan chak tawh hle," tiin a sawi.

Arsenal academy coach Patrick Kwame Ampadu leh Benfica Under-23 coach Joao Carlos Valado Tralhao te chu Henry coaching staff zingah an tel ang.