Netherlands lakah Germany mualpho

Russia rama FIFA World Cup-ah Germany-in mualpho takin group stage an paltlang zo lo a, UEFA Nations League-ah pawh an la ṭhangharh thei lo.

Joachim Low kaihhruai team hi an match hmasa berah France nen an inhnehtawk a, Inrinni zan khan Netherlands chu 3-0 in Amsterdam-ah an hneh lo.

League A group 1-ah France-in point li hmuin hma­hruaitu an ni a, point thum hmu Netherlands chu pahnihnaah awmin table mawngphahah point khat chiah la hmu Germany an awm.

An hriam lo

Germany tan Schalke striker Mark Uth chuan a vawi khat nan bul a ṭan a, kum 27 mi hi Joachim Low hnuaia ram tana vawi khat nana bul ṭan player 100-na chiah a ni.

Amaherawhchu tun season Bundesliga-a goal hnih chiah la khung Uth hian tlarhma a tihhriam belh lo a, Germany starting eleven-a Bayern Munich player panga ngawt awm chuan an team a tihchak phah chuang lo. Tun hnaiah Bavarians an tla hniam a, an national team pawhin an tuar niin a lang.

Low-a hote hi mual sir lamah Timo Werner hoin an nawr na a, Thomas Muller pawhin RB Leipzig forward hi a thlawp ṭha a, amaherawhchu Netherlands keeper Jasper Cillessen a langsar ber.

Barcelona keeper hian Muller, Toni Kroos leh Uth te goal khung tur a dan sak vek a, Germany tlarhma an hriam lo.

Liverpool defender

Netherlands tlarhnungah Virgil van Dijk a ding khawng a, Liverpool defender hi goal hmasa ber khungtu pawh a ni. Minute 30-naah Memphis Depay-a corner pet chu Ryan Babel-a'n tauhin crossbar a per hnuah Van Dijk-a'n a tauh lut.

Second half-ah Leroy Sané leh Julian Draxler te lutin Ger­many goal nawr na sawt mah se goal an keng tel bik lo a, goal khung an tum luatah goal an chhuah zui bawk.

Minute 86-naah Manchester United winger hlui Depay chuan counter attack aṭangin Netherlands goal hnihna a khung a, Liverpool midfielder Georginio Wijnaldum chuan injury time-ah chak nem­nghehna goal a khung.

Eng nge an sawi?

Netherlands coach Ronald Koeman chuan, "Ka nauten an theihna zawng zawng an chhuah avangin ka chhuang tak zet a, inkhel ṭha tak kan khel thei tih kan lantir bawk. Chutihrualin kan bul ṭan dan leh inkhel ṭhenkhatah tihfuh loh chang kan ngah tho a, Germany lakah phei chuan kan tih loh tawp tur a ni. Tun ṭumah hremin kan awm lo a, insiam ṭhat nan kan hmang ang," tiin a sawi.

Germany coach Joachim Löw chuan, "Eng vangin nge goal khung kan harsat em em tih zawhna hi chhan a har a. Tun hnaiah result ṭha kan neih loh avangin inrintawkna nasa tak kan hloh tih chu a chiang. Chance ṭhahnem tak kan insiam a, goal kan khung loh chauh hi ka lungawi lohna a ni lo. Hun tawp lamah kan tlarhnung tlu sawp kha a dik lo, 1-0 in chak lo ila a hriatthiam awm a, 3-0 chu a dik lo. Kan insiam ṭha lo a nih chuan kan hmabak chu relegate a ni," tiin a sawi.