Ronaldo fan-ten thiam an chang

South Korea-a Cristiano Ronaldo fan-te chuan Juventus-in an rama pre-season friendly an khelh ṭuma Ronaldo inlan loh an zualko puinaah thiam an chang a, inkhel huaihawttu The Fasta chu fans pahnih hnenah £240 (Rs. 22,305) ve ve pe turin hriattir an ni.

July 2019 khan Juve hi South Korea-ah an ram league sang ber K League all-star team nena friendly match khel turin an zin a, huaihawttu lamin Ronaldo hi minute 45 tal khelmualah a inlan tur thu an sawi - minute thum pawh a ral hmain ticket 65,000 an hralh zo nghal vek!

Mahse, Portuguese forward hi bench-ah a awm tluan a, an player ngaihsan em em luhtir a nih loh avang hian fans ṭhenkhat lungawi lo chu court lamah an zualko ta a ni. 

Fan-te aiawha court hmaa ding ukil Kim Min-ki chuan, "The Fasta-te hian dik lo takin thil an ti a, Ronaldo fan-te chu an pawl hlawk nan an hmang a ni," a ti a, fans lungawi lo 87-in Ronaldo inlan loh vang hian thubuai an thehlut ve bawk. 

South Korea-a professional football league sang ber K League enkawltute pawhin Juventus hnenah an lungawi loh thu lehkhain an thawn tawh a, Fasta lam hian thuchhuah engmah an la nei ve lo thung.