United-in Solskjaer an thlawp

Manchester United executive vice-chairman Ed Woodward chuan sawisel hlawh tak manager Ole Gunnar Solskjaer lam an la ṭan tlat thu a sawi a, "Ole-a hnuaia kan kawng zawh mekah hian rinna kan nghat tlat a ni," a ti. 

Manchester United hian Premier League-a Arsenal an ngam loh hnuin Champions League-ah Istanbul Baseksehir an ngam lo zui a, league-ah 3-1 in Everton hneh leh tawh mah se tun hnai result avangin Ole-a'n sawiselna a pumpelh lo. 

United hi Premier League-ah 14-na an ni mek a, an match hmasa pasarihah vawi thum chakin vawi thum an tlawm a, vawi khat an khingpui an inhnehtawkpui a ni. 

Khawthlang media ṭhenkhat chuan Ole thlak tur hian United-in Tottenham Hotspur boss hlui Mauricio Pochettino an bia niin an sawi a, mahse Ed-Woodward thusawi hi rin tur a nih chuan Norwegian coach hi a chhuak mai dawn lo. 

United hian tun hnaiah July 1 aṭanga September 30 inkara an sum lakluh an puangzar a, hetih chhunga an sum lakluh belhkhawm hi pound maktaduai 109-a tling a, hei hi nikuma hetih chhunga an sum lakluh aṭanga tehin 19.5% in a hniam zawk. 

Covid-19 vanga a hmuna inkhel en theih a nih loh avangin ticket aṭanga United sum lakluh chu nasa takin a tlahniam a, hetihrual hian membership sales leh Old Trafford-a hmun luah chhawntir aṭangin pound maktaduai 1.7 vel an lal lalut tho bawk. 

July-ah Premier League game a awm avangin broadcasting aṭanga United sum lak erawh a pung thung a, hetihlai hian sumdawnna aṭanga an sum hmuh chu 25.7% a tla hniamin pound maktaduai 59.7 a ni.