Mizo tleirawl Siami tan Silver

Summer Youth Olympic Games 2018 neih mekah Lalremsiami Hmar telna India nula hockey khel thiam ten final lut mah se a thlengtu Argentina 3-1 in an hneh lo a, Mizo tleirawl Siami ten silver medal an hlawh chhuak.

Pathianni zan khan Buenos Aires, Argentina-ah India tleirawl hockey khel thiam ten gold medal pahnih an beisei a, hmeichhe team an chak zawh loh bakah mipa team pawh Malaysia lakah 4-2 in an chak lo a, hockey team hian duhthusamin a hmawr bawk thei lo mah se silver medal pahnih an vaw chhuak ta tho a ni.

Mizo nula
Gold medal match an khelh hma hian Siami hian, "Pool match-a kan hneh loh kha an ni a, final-ah erawh hneh let ngei kan tum. Kan inbuatsaihna pawh a ṭha khawp mai," tiin Vanglaini a hrilh a, pool match-a 5-2 a an hneh loh lakah chak ngei an tum thu a sawi.

India hian bul an ṭan fuh a, inkhel ṭan aṭanga second 49 hnu lakah Mumtaz Khan hmangin goal hmahruai an khung - India beiseina a sang zual. Mahse, minute ruk hnu lekah Gianella Palet hmangin Agentina lamin an sut.

Chawlhlawk hmain a thlengtu lamin Sofia Ramallo hmangin an hmahruaina goal an khung a, second half-ah Brisa Bruggesser-i'n an dinhmun siamṭhat zual nan goal khung lehin, an ramah ngei a vawi khat nan Youth Olympic Games Hockey gold medal an la.

Siami tan silver
India vice captain Siami hi Mizo zingah Youth Olympic hockey huanga silver medal la thei hmasa ber a ni a, August thla khan Mizo infiammi zinga a hmasa ber ni tur bawkin Asian Games 2018-ah silver bawk a la tawh.

Kolasib tleirawl Siami chuan, "Hmun hrang hranga min duhsaktu zawng zawngte chungah ka lawm a, Mizo mipui ka tana bang loa ṭawngṭai ṭhinte chungah thinglung takin lawmthu ka sawi bawk. Tun dinhmun ka thlen theih nana tha thawhtu Hockey Mizoram bakah coach leh min kaihruai tawhtu zawng zawng chungah pawh ka lawm," tiin Vanglaini a hrilh.

Youth Olympic-ah hian hockey hi 5-a-side tournament a ni a, match khat hi minute 20 zela rei a ni. India senior team tan pawha inlan fo tawh Siami hian match riat a khelh aṭangin goal kua (9) a vaw lut a, inelna pumpuia goal khung hnem ber chu Australia tleirawl Courtney Schonell (14 goals) a ni.

Hockey Mizoram an lawm
Lalremsiami Hmar hlawhtlinna chungchangah Hockey Mizoram chuan thuchhuah an siam nghal a, khawvel hmaa Mizo ti hmingṭhatu Siami chu an chhuan bakah an lawmpui hle. Thuchhuah siamin Hockey Mizoram chuan, "Lalremsiami Hmar telna India hmeichhe hockey team chuan Youth Olympic games 2018 neih laiah, October 14, Pathianni zan khan silver medal an vaw chhuak a; khawvel tleirawl infiammi ṭha zual inelna huanga Mizo nulain silver medal a hlawh chhuak thei hi Hockey Mizoram chuan a lawmpui hle.

Hockey Mizoram chuan India ram chhung mai ni lo, khawvel huapa Mizote min ti hming ṭhatu Lalremsiami Hmar hi a chhuang takzet a, nakin zelah pawh Pathian leh kan ram tan hlawhtlinna a chan zel theih nan duhsakna sang ber a hlan bawk a ni," an ti.

Lalremsiami Hmar Zinkawng
2000 : Lalremsiami Hmar pian kum.
2011 : Kum 11 mi chauh niin Thenzawl Hockey Academy a zawm.
2016 : National Hockey Acdemy a awm turin thlan a ni a, November thlaah a lut.
2017 : India Junior Camp tana training a nei lai chu India coach Harendra Singh-a'n hmu fuhin, senior team tana khel turin a ko.
2017 : November thlaah India tan Asian Cup a khel a, match zawng zawngah inlan vekin goal hnih a khung; India a champion pui.
2018 : April 4 - 15 chhunga neih 2018 Commonwealth Games-ah India tan koh a ni a, kum 17 mi chauh a la nih avangin squad player naupang ber a ni; Malaysia 4-1 a an sawp
ṭumin goal khat a khung.
2018 : Women’s Hockey World Cup 2018-ah India aiawhin a inlan a, kum naupang ber a ni zel. India hi semifinal a thlenpui a, Italy an hneh ṭumin goal a khung.
2018 : Asian Games-ah India ai a awh leh, Asian ramte inelna lianah hian goal li khungin, India chu silver medal a vuak chhuah pui a ni. Mizo infiammi zinga Asian Games medal la thei hmasa ber a ni nghal.
2018 : 2018 Summer Youth Olympic Games-ah India tan silver medal a dawng.

Silver Medal Kalkawng
Pool B Match
India 4 - 2 Austria
India 2 - 1 Uruguay
Vanuatu 0 - 16 India
India 2 - 5 Argentina
South Africa 2 - 5 India
Quarterfinal
India 3 - 0 Poland
Semifinal
India 3 - 0 China
Final
India 1 - 3 Argentina