Chanmari FC coach thar Chawnga

Mizoram Premier League-a vawi hnih champion tawh Chanmari FC chuan nimin khan coach Lalruatliana Sailo (Tawia) nen an inṭhen thu an tichiang a, coach atan Chawngthansanga an lakluh thu an puang nghal bawk.

CFC hian MPL7-ah match sarih khelh aṭangin point 10 an hlawh chhuak a, palina dinhmun an hauh mek. Chanmarians club hotuten nomawi an la duh reng a, amaherawhchu MFA Super Cup final-a an hneh loh Chhinga Veng bawk Serchhip-a an hneh loh nawn avangin insiamṭhat tumin coach an thlak.

Chawngthansanga hian MPL hmasa berah Reitlang FC a tlin pui a, hemi hnu hian Chanmari West FC leh Chhinga Veng FC te a enkawl leh tawh bawk. Chanmari pawh hian an veng team enkawl turin Chawnga hi an chhawr tawh bawk a, chuvangin tun ṭuma an lalut pawh hi a mak hran lo.

Chutihrualin Chanmari FC-in thutlukna huaisen tak an siamah a ngaih theih a, Chawnga hian a club enkawl semifinal a la thlenpui ngai lo. MPL5 champion hian nimin khan Chawnga hoin training an ṭan nghal a, October 18 zanah an elpui Mizoram Police an hmachhawn nghal dawn.

Tun hi MPL7-a coach an thlak vawi hnihna a ni a. Ramhlun North coach Lalrozara chuan beisei ang result an neih loh hnuah banna a thehlut a, anni hian Rozara thlakna turin Aizawl FC Under 18 coach Nicky Malsawmtluanga an lalut thung.