Suzuki Gixxer Cup ; Malsawmdawngliana'n pahnihna a hauh

Inrinni leh Pathianni tlai khan Kari Motor Speedway, Coimbatore-ah 21st Jk Tyre FMSCI National Racing Championship neih a ni a, Suzuki Gixxer Cup inelna huang bikah Mizo rider Malsawmdawngliana (Lalmama) chu pahnihna a ni a, Anthony Lalawmpuia chu pangana a ni thung.

Inrinnia intlansiak hmasa zawkah championship neih meka pakhatna dinhmun hauh mektu Joseph Matthew chu el phaktu awm loin pakhatna a ni a, Malsawmdawngliana hi pahnihnaah a thleng thung.

Pathianni tlai intlansiakah Lalmama leh Chennai rider Matthew inum a hmuhnawm hle. Rider pahnih an intlan pelh chhawk zak zak hnuah a tawpah Matthew a dingchang a, second 0.082 leka hnufualin Malsawmdawngliana chu pahnihnaah a lungawi a ṭul.

Suzuki Gixxer Cup inelna bikah champion lai Joseph Matthew chuan intlansiak vawi ruk awm tawhah pakhatna hauh vekin hma a hruai mek a, point 60 a nei mek.

Matthew-a hnuaiah hian Syed Muhamad Ali chu point 41 hmuin pahnihna a ni a, point 37 hmutu Malsawmdawngliana tan champion ai chuan pahnihna nih chu beiseiawm zawk a ni tawh.