Dan theih loh Djokovic

Novak Djokovic chuan tun hnaia player khel ṭha tluang ber a nih zia lantir chhunzawm zelin Borna Coric a hneh a, Serbian tlangval hian tun hnaia nomawi pali a chawi zawnna ni turin Shanghai Masters title a la.

Pathiannia final in-khelah seeded pahnihna Djokovic hian darkar khat leh minute 37 chhungin 6-3, 6-4 in hnehna a chang. Semifinal-a Roger Federer hnehtu Coric tan Masters 1000 final vawi khat khelhna a ni a, inkhel boruak sangah Djokovic a ngam lo hle.

Kum 31 mi Djokovic hian tun hnaiah match 18 chhung hnehna a chang zawn tawh a, August 10 khan Rogers Cup-ah a chak lo tih mai loh chu chak loh a nei tawh lo, tunkara ranking chhuak thar berah chuan Federer khumin pahnihna dinhmun a luah dawn a ni.

Grand Slam vawi 14 champion tawh Djokovic chuan, "Tun hma lam chuan Chinese mi ka ni tawh hial mai thei a ni," tiin China chu nuam a tih thu fiamthuin a sawi. China-ah hian final vawi 11 a khelh chinah hnehna a chang fai vek thei a, Shanghai Masters a lak leh chiah hian tennis a khelh hun chhunga Masters title 32 a lakna chiah a ni bawk.