France jersey hliptu Koscielny

Arsenal defender Laurent Koscielny chuan international football a chawlhsan thu a sawi a, France tana match 51 khel tawhtu hian an ram jersey a ha tawh dawn lo tihna a ni - Gunners captain hian an ram coach Didier Deschamps chu ualau takin a sawisel bawk.

Kum 33 mi Koscielny hi May thlaa Atletico Madrid nen Europa League semifinal an inkhelh ṭumin a inhliam a, hei vang hian World Cup-ah pawh an ram aiawhin a kal ve thei lo. Ram tana a inlan hnuhnung ber chu March thlaa Russia nen friendly match an khelh ṭum kha a ni ta.

Nikum khan Koscielny hian World Cup 2018 zawh hnuah ram tana inkhelh a chawlhsan tur thu hi a sawi lawk tawh a, Russia-ah inlan thei ta lo mah se thutlukna a lo siam tawh sa angin a ding tlang - a chawl hi club lam tan chuan chanchin ṭha a ni ang.

A tawp ta
Ke artui hliam vanga Premier League season pawh la ṭan ve thei lo Koscielny chuan a chawlh thu sawiin, "Ka ngaihdan chuan France tan hian ka theihna zawng zawng ka hlan ṭhin, tun aṭang chuan France ṭantute zingah ka tel kumkhua tawh ang. Blues jersey hi kei chuan ka ha tawh ngai dawn lo a ni.

"Ngaihdan thar ka nei a, hliam ka neih hmaa Koscielny ka nihna ang kha ka ni reng dawn a, a rang thei ang berin Arsenal tana khelh theih ka duh. Hmun chang tura chona hmachhawn theih ka chak tawh a ni," tiin a sawi.

Unai Emery-a'n Arsenal a enkawl tirh khan Koscielny hi a captain a nih chhunzawm tur thu a sawi chiang a, hliam vanga a inlan theih loh chhung hian tlarhnung laiah Shkodran Mustafi leh Rob Holding te an inkawp fuh hle; hmun chang tur chuan a thawhrim a ngai dawn a ni.

A lawm lo
Hliam vanga chawl mek Laurent Koscielny hian ram leh club tana inlan thei loa awm chu hrehawm a tih thu a sawi a, France coach Didier Deschamps hnen aṭangin ngaihsak a hlawh em tih zawna chhangin, "September thla khan ka brithday a ni a, chumi ṭum chuan Deschamps hian min rawn bia, a bak chu a awm lo.

"Coach chauh hi a ni lo a, midang hnen aṭang pawhin ngaihsakna ka dawng chuang lo. Ṭha taka kan khelh lai leh vanglai kan hman chuan ṭhian kan ngah a, hliam vanga hun harsa ka hman lai erawhin min hrereng ve tawh lo. A nihna takah chuan hnung lam aṭanga na taka inbeih ang mai a ni," tiin an ram team lam aṭanga ngaihsakna a dawn loh thu a sawi.

European Championship 2012 leh 2016 bakah 2014 World Cup-ah te khan Koscielny hi ram tan a inlan a, a hun hmasa lamah ram tana koh hlawh tawk lo mah se 2012 chinah erawh rinrawl a ni, inelna lian a hmachhawn hnuhnung ber tur a khel thei lo chuan a rilru a tih hrehawm thu a sawi.

Koscielny chuan, "Hliam hi thil pakhat a ni a, World Cup khelh loh pawh chanchin dang a ni. Chutihrualin ṭhian ten hlawhtlinna an chan laia inlan ve thei lo nih kha chuan rilruah nghawng na tak a nei, ka hliam aiin ka rilru hrehawmna pawh a nasa zawk hial ang," a ti.