Ranji Trophy khel turin Mizoram team an chhuak

India ram chhunga first class cricket inelna ngaihhlut Ranji Trophy chu November 1 aṭangin khelh ṭan a ni dawn a, Mizoram chuan match hmasa berah Nagaland chu Dimapur-ah an hmachhawn dawn.

Mizoramin Ranji Trophy thleng tura infrastructure a la neih ṭhat tawk loh avangin Jorhat, Assam-ah an innghah a ngai dawn a. Nimin khan Mizoram team chuan training ṭha zawk nei turin Jorhat an pan.

Ranji Trophy chu

Inelna hi Indian mi, interna-tional cricket khel hmasa ber Ranjitsinhji hming chawiin Ranji Trophy tih a ni a, kum 1934 aṭanga khelh ṭan a ni. Match khat rei zawng hi match li a ni a, kumin hi vawi 85-na tur ni tawh mah se Mizoram tan chuan thil thar a ni ang.

Mizoram captain K. Vanlal-ruata chuan, "Mizoram chhungah chuan limited overs-ah over 50 kan khel tling ngai lo a, test match kalhmang hi chu exhibition match angin vawi hnih khat chu khelh a ni ve tawh a. Amaherawhchu Ranji Trophy nen chuan khaikhin chi rual a ni lo," tiin Vanglaini a hrilh.

Vijay Hazare Trophy ang thoin Mizoram hi Plate Group-ah Arunachal Pradesh, Bihar, Manipur, Meghalaya, Nagaland, Puducherry, Sikkim leh Uttarakhand te nen an awm ho dawn a ni.

Jorhat-ah daih

Mizorama cricket khelhna hmun ṭha ber Suaka Cricket Ground, Sihhmui chu inelna lian zawk thlenna tura chei ṭhat theih la ni mah se tun dinhmunah chuan Ranji Trophy thleng tur khawpin a la ṭha tawk lo a. Inelna thlenna tura mamawh dang, inkhel turte thlenna tur hotel leh mamawh ṭul dang Mizoramin a la nei ṭha tawk lo bawk.

Tunah hian Ranji khel tur Mizoram squad hi la tihchian a ni lo a, Vijay Hazare khel tura feh chhuak player 14 bakah stand by paruk leh Under 23 squad a mi tlem a zawng ten training an chhim dawn. Jorhat-a che ṭha te hian Ranji Trophy-ah Mizoram ai an awh ang.

Ranji Trophy - Mizoram Fixtures
Khelh Hun Khingpui Khelhna Hmun
Round 1
1-4 Nov 2018 vs Nagaland Dimapur
Round 2
12-15 Nov 2018 vs Arunachal Jorhat
Round 3
20-23 Nov 2018 vs Manipur Jorhat
Round 4
28 Nov- 1 Dec 2018 vs Puducherry Puducherry
Round 5 Mizoramin match an nei lo
Round 6
14-17 Dec 2018 vs Sikkim Jorhat
Round 7
22- 25 Dec 2018 vs Meghalaya Shillong
Round 8
30 Dec- 2 Jan 2019 vs Bihar Jorhat
Round 9
7-10 January 2019 vs Uttarakhand Dehradun