MPL khelh hun thlak danglam
Mc Dowell's No. 1 Soda Mizoram Premier League Season 7-ah league round chanve khelh zawh a ni tawh a, round sarih dang khelh hma bakah a awm. Tun kar hian round 8-na khelh chhunzawm a ni dawn a, Lammual remchan dan a zira inkhelh hun thlak danglam a ni.
Fixture tih danglamah hian Ningani leh Zirtawpni tlaia inkhel tur chu ni khat ve vea sawn hma a ni a, inkhel hun sawn hret a ni bawk. Nilaini tlai dar 5:30-ah Chawnpui leh Aizawl FC ten round 8 inkhel hmasa ber an khel dawn a, en a châkawm takzet. I League club tan Ansumana Kromah chu Serchhip-ah a inlan ṭan a, a thiamzia a pholan nghal avangin Chawnpui nena Lammuala che vel hian entu a hip nghal dawn. MPL kai thar tan AFC nena an inkhel tur hi semifinal beiseina tinung zel atan a pawimawh a, hei hian inkhel a tihmuhnawm tel bawk ang.
October 17 zan dar 8:00-a inkhel tur Ramhlun North leh Bethlehem Vengthlang te erawh semifinal lam a ni lo a, relegation battle tiha sawi theih a ni. Point mamawh pahnih hian Serchhip-ah point an hlawh chhuak lo a, an inkhelh hmasak zawk ṭuma an inhnehtawk bawk avangin an inkhel tur hi a pawimawh ang.
October 18 tlai dar 4:00-ah hmahruaitu inchuhna a awm leh dawn a, Electric Veng boruak nung ṭha leh champion lai Chhinga Veng inkhel tur hi dah hniam theih a ni lo. Team pahnih hi tun season MPL-ah an result ringawt a ṭha lo a, khelmuala an chevel a hmuhnawm bakah ṭantu an neih ṭhat avangin an inkhel tur hi boruak a sang leh ang. An intawn hmasak zawk ṭumin Chhinga Veng an chak a, nomawi chawi turin Electric Veng an ṭha tawk em tih fiahna ṭha tak a ni dawn.
Zan lamah Mizoram Police leh Chanmari FC an khel dawn a, round 8 inkhel tur pali zinga ṭha berah a ngaih theih. Tun season-ah beisei aia Electric Veng an che ṭhat avangin club lian Aizawl FC, Chanmari FC leh Mizoram Police zingah semifinal khel lo tur an awm dawn a, zanina chak lo zawk tan a sang pali zinga invawrh chhoh a harsa dawn.
MPL7 - Round 8
October 17, Nilaini
Chawnpui 05:30 PM Aizawl FC
Ramhlun North 08:00 PM Bethlehem VT
October 18, Ningani
Electric Veng 04:00 PM Chhinga Veng
Mizoram Police 07:00 PM Chanmari FC