Low a hmalam hun a hril dawn

Germany chuan zanin dar 12:15 hian Stade de France-ah an world champion lallukhum chhuhsaktu France an hmachhawn dawn. Die Mannschaft hian FIFA World Cup hnuhnung bera mualpho taka an tlak hnuah friendly match-a Peru 2-1 a an hneh

ṭum chiahin hnehna an la chang a, UEFA National League vawi hnih an khelh tawhah chak hmel an la hmu lo.

Kum 58 mi Joachim Low chuan Germany vawi 168 a enkawlnaah Netherlands 3-0 in an hneh lo a, ram tana team enkawl tam ber ni turin Sepp Herberger (167) khum chiah mah se tun hnaia an record ṭha lo avangin a dinhmun a him ta lo a, ban theih dinhmunah a ding tawh a ni.

Boateng a tel loin

Germany-in Netherlands an hneh loh ṭumin defender Jerome Boateng chuan a chawn a ti hliam a, Amsterdam aṭangin an ram lama thawn haw hma niin France a hmachhawn thei dawn lo.

Die Mannschaft tlarhnung phui tawh lo sa tih phui chu Low hna hmasa a ni dawn a, France tlarhmaah Kylian Mbappe, Antoine Griezmann leh Ousmane Dembele te an awm a, heng player ṭha chawm turin Paul Pogba te an awm bawk avangin Germany hmabak a êng lo hle.

Ban a hun?

Germany captain hlui Michael Ballack chuan, "Hun rei tak team a enkawl tawh a, a fuh tawh lo a ni. World Cup zawha ban a ni lo kha mak ka ti," tiin a pu hlui Low-a hun chu tawp tawh se a duh thu a sawi.

Joachim Low chuan Nether­lands an hmachhawn ṭumin World Cup-a right back-a chhawr Joshua Kim­mich chu defensive midfield-ah a chhawr a, Bayern Munich player chhawr kual hlawh tak hian eng ruai a ang lo.

Germany boss hian player upa zawk chungah rinna a nghat rei a, World Cup-a an chetsual hnuah pawh nau­pang zawk aiin Thomas Muller chuan rin a hlawh zel a, amaherawhchu Bayern star hian an ram mipui lawmna siam a harsat.

Player naupang zawk leh beiseiawm Leroy Sane, Julian Draxler leh Julian Brandt te bench lama a dah laiin mi hriat hlawh lo Mark Uth chu a vawi khat nan bul a ṭantir lawi si a, Low hian an ṭhat dan ber hi a hre fuh hleithei lo ni berin a lang.

Germany coach Joachim Low tan France nena an inkhel tur hi a pawimawh dawn a, an chak zo lo a nih chuan ban duhtu an pung leh sawt ang.

Team dinhmun

League A group 1-ah France (4 pts), Netherlands (3) leh Germany (1) te vawi khat ṭheuh an inkhel kual tawh a, tunah hian vawi khat dang an la inkhel kual leh dawn.

Germany hian world champion France an hneh erawh chuan a dinhmun ṭha lo tak hi vawi leh khatah a kang leh dawrh thei dawn a, an chak loh thung erawh chuan relegate thei dinhmunah an ding ang.