Del Potro dinhmun a chiang lo

Tennis mipa world number 4 Juan Martin del Potro chu tun season chhung inkhel thei tawh lo tur dinhmunah a ding mek, Argentine tlangval hi Sanghai Masters a khelhna lamah a khup a hliam a ni.

Kum 30 mi Del Potro hi last 16-ah Borna Coric nen an inhmachhawn a, set khatna a hloh hnuah khup hliam vangin a khel zui thei lo. Coric hian semifinal-ah Roger Federer hneh zui leh mah se nomawi inchuhna inkhelah erawh Novak Djokovic a ngam lo thung.

US Open 2009 champion Del Potro chuan, "Ka tan chuan hun harsa tak a ni, a nihna takah chuan ka lungngai hle. Ka dinhmun ngaihtuah hian season tawp hmaa khelh tur ATP Finals-ah pawh ka inlan theih a beiseiawm loh," a ti.

November thla hian London-ah ATP Finals khelh a ni leh dawn a, ranking-a a sang pariat chin tana buatsaih a ni. Del Potro hma hian Rafael Nadal, Djokovic leh Roger Federer te chu inlan tur hian an lo tling tawh a ni.