Lajong-in ram pawn player nei dawn lo!

Shillong Lajong chuan I League lo awm tur atan foreign player lakluh an tum a, Indian player hlang­in India rama club football inelna sang ber hi an hmachhawn dawn!

Meghalaya club hian season hmasa khan ram pawn player pali nei chungin I League hi an hmachhawn a, kuminah erawh pawisa sen a tlem zawk nan Indian player hlangin an khel dawn a ni.

Lajong hian Shillong Premier League (SPL) 2018-a an player ngai deuhthaw an hmang dawn niin an sawi a, hetiang a nih chuan an kum chawh rual hi kum 19 vel bak a ni dawn lo tihna a ni!

Lajong coach Alison Kharsyn­tiew chuan, "Shillong Premier League kan khel mek a, kan player neihsa te nena I League hmachhawn hi kan duh a ni.

"Ram pawn player awm miah loa I League khelh chu chona hautak tak a ni dawn tih a chiang a, mahse coach ka nihna anga theihtawp chhuahin ka player-teah rinna ka nghah a ngai dawn a ni. Chutiang chuan ka player-te pawhin mahni inrintawkna sang tak an neih a ṭul ang," a ti.

January-ah transfer bazar hawn leh a ni dawn a, Lajong hian he hunah hian an result a zirin ram pawn player an lakluh leh mai ringtu an tam hle.

Mahse, Lajong coach Alison Kharsyntiew chuan, "January transfer chungchang kan la sawi ri lo hrim hrim a, tun dinhmunah chuan Indian player nen chauha khelh hi kan tum a ni," tiin a sawi.

Season hmasa khan Shillong Lajong hian Mizo rawlthar Samuel Lalmuanpuia chu captain atan an hmang a, Emerging Player of the League-a thlan zui forward bawk hi captain ni leh tura beisei a ni.