Sofia Open champion thar Sinner

Inrinni zan khan Sofia Open chu khelh zawh a ni a, rawlthar Jannik Sinner chuan Vasek Pospisil lakah 6-4, 3-6, 7-6(3) a hnehna changin nomawi a chawi a, tun hnai kum 12 chhunga ATP title la thei naupang ber a ni.

August thla a kum 19 tling hlim Sinner hian a service neih ṭhat chhawr ṭangkaiin vawi 14 ngawt aces a siam a, a service aṭang hian 75% ngawt point a hmu thei. Italian tlangval hian a khingpui service hi vawi hnih chhuhsakin hnehna a chang.

Kum 2008 khan Kei Nishikori chuan kum 18 mi chauh ni chungin ATP title a lo la tawh, hun rei tak hnuah Japanese tlangval ang bawkin Sinner-a'n kum 20 tling lo chungin hlawhtlinna a chang ve leh theih chauh.

Tun season chhung hian hrileng vanga hun harsa karah player paruk ngawtin an nomawi hmasa ber an chawi. Sinner hma hian Ugo Humbert, Casper Ruud, Miomir Kecmanovic, Thiago Seyboth Wild leh John Millman te pawhin hlawhtlinna an lo chang tawh a ni.