Crawford-a'n WBO title a humhim

Terence Crawford chuan WBO world welterweight title humhim turin Pathianni zing khan Las Vegas-ah British mi Kell Brook a hneh.

Kum 33 mi Crawford hian round linaah IBF welterweight champion hlui Brook hi a kut dinglamin chiang takin a hnek fuh a, kum 34 mi Brook hian a dawl zo lo. Referee-in a inhnek a ti tawp a, Crawford hi chakah puan a ni.

December 2019 hnuah Crawford hi a inlan leh chauh a, British boxer chuan, "Tun hnaiah ka inhnek loh avangin ka fimkhur a, ka duh angin ka hnek thei lo," tiin a sawi.

Crawford hian April 2019 khan Amir Khan a hneh a, fight vawi 39 a hmachhawn tawhah a la chak vek. Boxing khawvela record nei ṭha tak Crawford hi vawi riat world champion ni tawh. Manny Pacquiao nen pawh inhnek tura sawi a ni a, amaherawhchu Covid-19 vangin a la thleng rih lo.

Crawford chuan, "Brook nena kan inhnek hma hian Pacquiao nena inhnek turin inremna kan nei hman ṭep a, amaherawhchu Covid-19 vangin kan nghah rih a ṭul a ni," tiin a sawi a, Pacquiao leh Crawford hi ring-ah an intawng a nih ngat chuan khawvelin a ngaihven ang.