Tlai dar 5:30-ah Aizawl FC leh Chawnpui FC

17th October, 2018

Mc Dowell's No. 1 Soda Mizoram Premier League Season 7-ah season chawhnu lam chu vawiin tlai aṭangin khelh ṭan a ni dawn. Tlai dar 5:30-ah Aizawl FC leh Chawnpui FC te an inkhel dawn a, semifinal inchuhna a nih dawn avangin inkhel a hmuhnawm khawp ang.

Kromah tel loin
Aizawl FC-in Mohun Bagan leh East Bengal forward hlui Ansumana Kromah chu an lalut a, Liberian forward hian Serchhip-ah first half chiah a khel chungin goal a khung a, a khel ṭha em em bawk.

Kromah chevel a hmuhnawm a, MPL-a hmuh tur la awm loh (?) 'rabona kick' chu Serchhip mipui a hlui a, Aizawl FC goal nawr a tih nat phah hle. Amaherawhchu AFC coach Gift Raikhan chuan, "A malpuiah hliam a tawrh deuh avangin Kromah hi Chawnpui nen ka chhawr dawn lo. I League a hnaih tawh avangin fimkhur a ṭul a ni," tiin Vanglaini a hrilh.

A che ṭha duhsak
Chawnpui leh Aizawl FC an inkhelh hnuhnun ber ṭumin 2-2 in an inhnehtawk a, Vanlalthanga chuan halfway line pelh deuh hret aṭangin goal ropui a khung.

AFC coach Gift chuan, "Gurpreet khan MPL player a hrechiang lo a, he league hautak zia leh a khingpui player-te a hriat chian a ṭul. Match hmasa lamah che ṭha mah se Chawnpui nena a goal chhuah avangin Serchhip-ah Arema ka ven tir a, khelhna hmun chang turin an inel zel a ṭul," tiin khel chiang an awm loh thu a sawi.

Tlarhma player chungchang sawiin AFC boss chuan, "Kromah chhawr thei lo mah ila Mapuia kan la nei a, Remsanga leh Isak-a te an ṭha tawk em em a ni," a ti. I League club hian Liberian forward chhawr thei lo mah se foreigner pahnih Alfred Kemah Jaryan leh Kyrgyzstani midfielder Bektur Talgat Uulu te chhawr theih turin an la nei bawk.

AFC = Chak
Aizawl FC coach Gift chuan, "Team dang ka dahniamna ni lo se keini chu I League club kan ni a, point thum hmuh hi kan tih tur a ni a. Chawnpui nena kan inkhelh hmasak zawk khan kan inhnehtawk a, kha kha a thiang tawh lo," tiin Vanglaini a hrilh.

I League club hi Chawnpui FC nen hian chak zawk tura rinkai pawh an ni a, amaherawhchu an beisei ang ngawta awlsam a ni lo ang.

30% chak chance
Chawnpui manager H. Lalzawm-liana chuan, "Aizawl FC chu team ṭha an ni a, chutichung chuan chakna chance hi 30% chu kan la neiah kan ngai. Semifinal beisei theia kan la awm avangin kan elpui draw hi kan tum lo a, attacking game kan khel dawn," tiin risk an lak tur thu a sawi.

MPL kai thar Chawnpui hi paruknaah an awm mek a, I League club hi an hneh thei a nih chuan palinaa awm Chanmari FC point hmuh zat point 10 an hmu thei ang.