BVT-in Peter-a an hre reng

October 19, 2014 khan Bethlehem Vengthlang midfielder Peter Biak-sangzuala chu a goal khung a lawmna lama a chetsual vangin a thi a, tun Zirtawpni hi a kum li champha tur chiah a ni.

Zanin dar 8:00 hian Bethlehem Vengthlang leh Ramhlun North an hmachhawn dawn a, BVT club general secretary Lalnunfela Pachuau chuan, "Peter-a hi kan la theihnghilh lo a, amah hriat reng nan Ramhlun North nen ribbon dum kan hreng ang a. Kan inkhel tur hi Peter-a tan kan hlan dawn," tiin a sawi.

Tun season-ah BVT leh Ramhlun North ten match sarih khelh zawh aṭangin point hnih chauh an hlawh chhuak a, match riatna chauh ni mah se zanina inkhel tur hi 'Relegation Battle' tiha chhal theih a ni.

Round 8 hi Serchhip zin hmaa Lammual match hnuhnung ber round 6 letling zawng thawk kha a ni a, khami ṭum khan BVT leh Ramhlun North te 2-2 in an inhnehtawk.

Ramhlun North secretary Lalenghluna chuan, "Chak ngei kan tum a, kan chak ngei pawh ka ring. Attacking game khelh turin kan inzir a, BVT hmachhawn turin kan naute pawh an inpeih," tiin Vanglaini a hrilh.

October thla hi player inlak theih hunlai a nih avangin team pahnih hi an inthuam ṭha ve ve a, an inhriatchian chhoh bawk avangin zanin inkhel tur hi a hmuhnawm sawt ang.