Mayweather-a'n Khabib a chhanglet

American boxer ropui Floyd Mayweather chuan Khabib Nurmagomedov-a'n tun hnaia a chona chu rang takin a chhanglet nghal a, "Cheque bu rawn la chhuak rawh u," tiin contract ziahfel nghal a duh thu a sawi!

Conor McGregor hneh hlim Khabib hian, "Floyd, kan inhmachhawn ngei a ngai a ni. 50-0 vs 27-0, tu hmaah mah la tlawm ngai lo ve ve kan ni a, kan inhmachhawnna tur hian engin nge min dal?" tiin American boxer hi a lo cho tawh.

Floyd-a'n hnungtawlh a tum lo. Amah chotu hi twitter lamah chhangletin, "CBS, Showtime leh MGM Grand te khan cheque bu rawn la chhuak nghal ru," tiin fight-a neih dawna a thawhpui ṭhinte hming a lam a, Khabib hmachhawn ngei a duh.

Mayweather hian boxing chanchina sum tam bernaah tun hnaia UFC-a Nurmagomedov laka tlawm McGregor chu August 2017 khan round 10-naah a lo hneh tawh a, Khabib hian sum tam zia hriain Mayweather lam hi a hawi ve niin a lang.