Constantine leh Chhetri an inhmu thiam lo

India captain chhuanvawr Sunil Chhetri chu coach Stephen Constantine nen an inhmu thiam lo niin sawi a awm a, China laka Chhetri captain loh chhan kha English coach nena an inhmuhthiam loh vang niin an sawi.

Constantine hian India tana match pawimawh takah rin loh takin defender Sandesh Jhingan chu captain turin a ruat a, "Captain chuan coach ngaihdan a pu chhuak tur a ni," tiin a sawi deuh kher a, Chhetri a sawi chhanah an ngai.

Nikum khan Indian football team-a senior player-te chu Constantine nen hian an inhmu thiam lo niin an sawi tawh a, hetichung hian AIFF chuan English coach hi contract thar an ziahpui.

Chhetri hian Bengaluru FC lama a pu hlui Albert Roca chu coach ni turin a duh a, senior player tam zawkin Chhetri hi an thlawp bawk. Mahse, Asian Cup a hnaih tawh bawk si avangin Indian FA hian coach hi an thlak ngam rih lo niin a lang.

Thu lakna pakhat, a hming tarlan remchang lo chuan, "Chhetri leh Constantine hian thawhdun nuam an ti lo a, mahse a ṭul si. AIFF hian tuna coach thlak hi a tlai lutuk tawhah an ngai a, Constantine tan Chhetri hi player dang zawngin an zah em em a nih avangin thlauh thlak ngawt a rem lo bawk," tiin a sawi.