Djokovic-a'n Nadal a hnaih

World number 1 ni chuanga season khar tur a la chiang lo a, a chung bera awm lai Rafael Nadal chu Novak Djokovic-a'n a hnaih tawh hle. Serbian tlangval hian point 215 chauhin a phak tawh lo - ATP Finals khelh hmabak an la nei a ni.

Thawhṭanni zan khan Association of Tennis Professionals chuan rank-ing thar hi a ti chhuak a, hliam vanag China lama inlan lo Nadal-a'n point 7660 hmuin hma a la hruai, French Open champion hi court chhungah a hmel kan hmu lo chhunzawm a nih chuan a dinhmun a him tawh lo takzet.

Sanghai Masters cham-pion hlim Djokovic hi tun hnaiah a khel ṭha hle, a zawnin match 18 chhung zet hnehna a chang thei a, Wimbledon leh US Open nomawi a chawi hnuah hnunglam a hawi tawh lo. ATP Finals-ah a champion leh a nih pawhin a mak lo ang.

Grand Slam vawi 20 champion tawh Roger Federer-a'n match khel tam lo mah se season tir lama a chetṭhat vangin a chung lamah a la awm, Australian Open champion hi pahnihna aṭangin pathumnaah a tla hniam. Swiss star hnungah hian Juan Martin Del Potro leh Alexander Zverev te an awm ve bawk.

ATP Ranking Thar (Top 10)
1 Rafael Nadal ESP 7660
2 Novak Djokovic SRB 7445
3 Roger Federer SUI 6260
4 Juan Martin Del Potro ARG 5860
5 Alexander Zverev GER 5025
6 Marin Cilic CRO 4185
7 Dominic Thiem AUT 3825
8 Kevin Anderson RSA 3775
9 Grigor Dimitrov BUL 3440
10 John Isner USA 3290