Spain khelmualah Three Lions hahum ri a ring!
Kum 31 hnua a vawi khat nan England chu Spain khelmualah an chak ve leh ta. Three Lions hian Thawhṭanni zan khan UEFA Nations League-ah Spain chu 3-2 in an hneh.
England tan Raheem Sterling chuan goal hnih a khung a, Marcus Rashford chuan goal khat a thawh ve bawk - Three Lions goal hi minute 40 chhunga lut vek a ni!
Huaisen takin Spain-in an bei let a, Paco Alcacer leh Sergio Ramos hmangin rawn sut ṭhen mah se an chhuah hnem hman hret a, tho chhuak turin hunin a daih tawh lo.
Hahdam rawh khai Raheem!
Kum 23 mi Sterling-a'n kum thum chhung ngawt ram tan goal a khung tawh lo a, hemi kum chhung hian a club khelhna Manchester City tan erawh match 97 khelin goal 34 a khung lawi si.
City winger hi club tan a khelh angin ram tan a khel chhuak lo nia sawi a ni a, Thawhlehni zanah erawh ram tan match 27 chhung goal a khung loh hnuah amah sawiseltute chhangletin goal hnih a khung.
Sterling goal hmasa zawk hi Kane siamsak a ni a, minute 38-naah a goal hnihna a khung zui a, second half-a penalty pek a ni lo chu a vanduai bawk. A tawi zawnga sawi chuan Sterling a khel ṭha tluan zak a, ball a chan apiangin a hlauhawm thei.
Team 'Lian' chu
England coach Gareth Southgate-a'n vawi tam a sawi nawn chu, "Top team kan hneh phawt a nih loh chuan an zinga chhiar tel ve chi kan ni lo," tih hi a ni a, World Cup-ah semifinal an lut chungin Belgium chu vawi hnih an hneh lo a, Croatia lakah an tlawm bawk.
Spain erawh Luis Enrique enkawlna hnuaia insiamṭha mek an ni a, a match hmasa lamah nuamsa taka Croatia leh Wales a hneh theih avangin Barcelona boss hlui hi, "Hetianga bul ṭan ṭhat hi i inbeisei reng em?" tiin England an hmachhawn hma hian zawhna pek a ni reng.
Mahse, England an hmachhawn zawh meuhah chuan zawhna a danglam ta a, June 2003 hnua competitive match-a an tlawm tawh lohna an khelmualah ngei an tlawm a, England an lam.
Sawifiah rual loh...
Spain-in first half chhungin goal thum an chhuah a, June 1963-a Scotland laka 6-2 a an tlawm ṭuma first half-a goal li an chhuah hnua an khelmuala minute 45 chhunga goal thum an chhuah leh hmasak ber a ni.
Luis Enrique naute hian tun hnaia 'form' em em mai Alcacer hmangin minute 58-naah an si phurh an sut ṭhen a, Ramos-a'n minute 97-naah goal khat a khung ve leh bawk - an harh erawh a tlai hret.
Spain coach Enrique chuan, "First half-ah kan khel chhe takzet a, insiamṭhat kan ngai a ni. Ka player-ten tihsual an ngah em em a, kan tlawm zawk tih hi kan pawm mai a ngai a ni," a ti.
Southgate a lawm
England manager Gareth Southgate chuan, "Ka player-te hi an khelh danah an lawm tur a ni. Tlarhmaa kan player-te hi inkhelh hma khan team dang tan an hlauhawm zia kan hrilh a, kan sawi ang ngeiin Spain tan buaina an siam tluan chhuak zak a ni," a ti.
Sterling-a'n England tan a vawi khat nan match khatah goal hnih a khung a, Marcus Rashford-a'n minute 29-naa goal a khung khan ram tana match hnuhnung palia goal thum a khungna a ni - a match hmasa 25-ah goal thum a khung!
Harry Kane-a'n assist vawi hnih a nei bawk a, Tottenham Hotspur striker hian Three Lions tana match khata assist vawi hnih a neih hmasak ber a ni a, Southgate-a hnuaia England goal khung 44-a 39% (14 goals, 3 assists) chu a ke chhuak a ni.
UEFA Nations League
Inkhel Result
League A
Iceland 1 - 2 Switzerland
Spain 2 - 3 England
League B
Bosnia-Herzegovina 2 - 0 Northern Ireland
League C
Estonia 3 - 3 Hungary
Finland 2 - 0 Greece
League D
Belarus 0 - 0 Moldova
Luxembourg 3 - 0 San Marino