NBA Regular Season ; Western Conference lamah LeBron James

Basketball inelna sang leh ngaihhlut hlawh ber National Basketball Association (NBA) regular season chu tukin

aṭangin ṭan a ni leh ta a, tun season chhung hian chanchin ngaihnawm tak tak a thleng chho leh ngei tura ngaih a ni.

Dan hman lai tih danglam a awm a, player ṭhenkhat pawh­in an khelhna club an sawn bawk. Tun nipui bazar chhunga chanchin sawi hlawh leh ngaihnawm bera chhal ngam chu LeBron James-a'n tun hma lama a la khelh ngai lohna Western Conference club Los Angeles Lakers a pan hi a ni ang.

James awm loh hnuah Cleveland Cavaliers hi team hlauhawm an la ni phak ang em tih leh; champion lai Golden State Warriors tan nomawi humhim a harsa dawn em tih te chu zawhna langsar a ni - zawhna ṭhenkhat chu season laklawh laiin a chhanna kan hmu dawn a, a tawp hun tur erawh 2019 June thla a ni daih thung dawn.

Second 14

NBA match khat rei zawng hi minute 48 a ni a, quarter paliah ṭhen niin; quarter khat zel hi second 12 a ni. Ball a nun loh lai hun chhiar tel a ni lo a, khingpui te basket-a vawm lut turin hun tiam chin a awm bawk avangin a hmuhnawm tluanchhuak zak a, inthlahdah theih a ni lo bawk.

Season hmasa thleng kha chuan team pakhatin an khing­pui vawi khat nawr ṭuma an hlah hian, second 24 zel an nei let ṭhin, kumin aṭang erawh chuan second 14 chauh a ni tawh dawn! September 21, 2018 khan NBA Board of Governors chuan he dan thar hi a pawm, basket kan hmu zing sawt dawn niin a lang.

He dan hi NBA G League (2016-17) season, WNBA (2016) bakah 2018 NBA Sum­mer League-ah te kha chuan hman a lo ni tawh a, inelna sang berah hian an hmang zui ve dawn a ni.

GSW nge Rockets?

Golden State Warriors hian tun hnai season li chhunga vawi thum zet chu NBA nomawi an chawi thei a, season hnuhnung pahnihah a zawnin an champion thei. Golden State hian an player neih ṭhat an chhuahtir lo a, All-Star zinga mi DeMarcus Cousins an neih belh bawk - an buk a rit leh ber tura ngaih a ni.

Tukin dar 8:00 hian War­riors-in an match hmasa ber atan Oklahama City Thunder an hmachhawn nghal dawn a, an conference lama an elpui ber tura ngaih Houston Rockets chuan Ningani zing dar 5:30-ah New Orleans Pelicians an hmachhawn ve thung dawn.

Season hmasa khan Hous­ton Rockets chu Western Con­ference lama team hmuh­nawm ber anga chhal ngam an ni, American star James Harden hoa khel team hi regular season bikah chuan GSW chunga awm an ni. NBA champion ni ta chiah lo mah se an che chhe viau a nih loh chuan Warriors tana hnawk tham an ni ang.

James a insawm

A vawi khat nan LeBron James chu Western Conference lamah a inlan dawn. Lakers hian champion an tum ngam lo a nih pawhin, palian James an neih belh tawh avangin playoff tal chu khelh phak an inbeisei ang.

Season hmasa khan Lakers hi 11-na an ni a, regular season-ah match 35 hnehna changin, ṭum 47 chu an chak lo thung. Season ṭha tak an hmang lo a, playoff khel phak china awm pariatna Min­nesota Timberwolves hian vawi 47 hnehna an chang thei a ni.

Kum 33 mi James-a'n Lakers a pan hian sawi a hlawh a, amah sawiseltu lam chuan basketball aiin mimal hmingṭhatna leh sumdawnna lam vang niin an sawi. Mahse, James hian LA lama a kal chhan hi film leh thil dang vang ni loin, basketball vang chauh a nih thu a sawi tawh.

James an neih hnua an re­gular season bul ṭan nan Lakers hian Zirtawpni zing dar 8:00 hian Portland Trail Blazer an hmachhawn dawn a ni, James tan amah sawiseltute chhan let nan chuan bul ṭan ṭhat a pawimawh ang.