Indian shuttler-te hmabak a hautak

Tun kar chhunga khelh tur Denmark Open BWF Tour Super 750 tournament-ah Indian shuttler-te tan kawng a awlsam dawn lo hle a, PV Sindhu, Saina Nehwal leh Kidambi Srikanth te tan nomawi chawi tur chuan match hmasa ber aṭangin an fimkhur a ngai hle ang.

Olympic silver medalist Sindhu hian match hmasa berah Beiwen Zhang a hmachhawn dawn, US khua leh tui nihna nei Zhang hi player ṭha zawka ngaih hneh thei tak mai a ni a, tun hmain Sindhu nen an intawn hnuhnung vawi hnihah pawh a chak ve ve thei a ni.

Sindhu hian Zhang a hneh a nih pawhin kawng a awlsam dawn chuang lo, Olympic leh world champion ni lai Carolina Marin nen quarterfinal-ah an intawn a ngai dawn. Spain nula hi inelna lian final-a a hneh loh fo tawh a nih a, a tan phubak lak theihna hun ṭha a ni bawk ang.

Kum 23 mi Sindhu chuan, "Kawng awlsam chu a ni dawn lo khawp mai, a tir aṭanga a tawp thlengin thapui kan hman a ngai dawn a ni. Marin nen pawh chak zawk tur sawi theih a ni lo, match hmasa ber tur hi ka ngaihtuah hmasak ber chu a ni," tiin a sawi.

Indian badminton player zinga Olympic medal la hmasa ber Saina-i'n match hmasa berah Cheung Ngan Yi a hmachhawn dawn a, seeded chang phak lo a nih avangin Saina hian hnehna a chang a nih pawhin match hnihnaah seeded pahnihna Akane Yamauchi nen an inkhelh a ngai dawn - India nula pahnih an tlang zel a nih chuan quarterfinal-ah an inkhel thei bawk.

Mipa singles champion lai Srikanth chu tun season a khelhṭhat loh avangin a dinhmun a sang lo a, seeded pasarihna hian Hans-Kristian Solberg a hneh a nih pawhin match hnihnaah chuan Lin Dan nen an intawng dawn.

India chief coach Pullela Gopi­chand chuan, "Denmark hi tun hma­in kan tan hmun ṭha a ni tawh ṭhin, chawlh hman zawh hnua inelna hmasa a nih leh avangin player tin an khel ṭha thei tlang hle, keini pawhin theihtawp kan chhuah ang," a ti.