Brazil chakna Roberto Firmino An hmabak chu Uruguay

Brazil chuan hliam vangin an player ṭha ṭhenkhat chhawr thei lo mah se Venezuela 1-0 in an hneh. Inrinni zing 2022 FIFA World Cup qualifying a goal awmchhun hi Roberto Firmino khung a ni.

Inkhel dangah Uruguay chuan Colombia 3-0 in an lo hneh ve bawk. World Cup champion hmasa ber Uruguay leh vawi nga champion tawh Brazil te hi Nilaini zing dar 4:00 hian an intawng zui lehnghal ang.

Lionel Messi awmna Argentina pawhin Nilaini zing dar 6:00-ah Peru an lenchilh dawn. World champion vawi hnih ni tawh Argentina hian an match hnuhnung berah Paraguay an inhnehtawk pui a, point sarih neiin table-ah pahnihna dinhmun an luah.

Neymar leh Philippe Coutinho bakah Casemiro, Fabinho leh Rodrigo Caio te chu hliam vangin an inlan thei lo. Defender Eder Militao chu coronavirus vangin a inlan thei dawn lo bawk. Harsatna karah coach Tite-a‘n tlarhnung a remphui a, an mamawh tawk goal an khung thei tho bawk.

Richarlison goal khung chu offside vanga pawm ni lo mah se, second half-ah Liverpool forward Firmino-a‘n hnai tak aṭangin goal awmchhun a khung. Venezuela lamin ball possession 26% chauh an nei thei a, minute 90 chhungin goal zawnah vawi khat chiah an pet thei a ni.

Brazil hian match thum an khelh aṭangin point kua an hmu, a chung berah an awm a ni - World Cup qualifying bika an chak loh hnuhnung ber chu 2015 daih tawh kha niin Chile 2-0 in an ngam lo. Chak lo Venezuela erawh in point an la nei ve lo, World Cup khelh an duh a nih chuan insiamṭhat ran an mamawh hle.

Hnehna an chan hnuah Brazil defender Marquinhos chuan an hmabak a hautak tur thu a sawi zui. PSG defender chuan, „Uruguay nena kan inkhelh a piang hi indona a ni zel, khel dan phung nghet leh ṭha tak nei an nih avangin a hautak dawn hle,“ a ti.

Uruguay hian Manchester United striker Edinson Cavani, Luis Suarez leh Darwin Nunez te goal hmangin team ṭha Colombia 3-0 in an sawp thei, an khelh fuh ṭum a nih chuan Brazil pawh hneh thei turin an ṭha tawk.

Inkhel dangah Chile pawhin Arturo Vidal goal hnih hmangin Peru 2-0 in an hneh ve bawk. South America aṭang hian ram pali chuan World Cup an khel nghal dawn, pangana erawhin playoff an khelh a ngai dawn a ni.