Hamilton a champion ang - Wolff

Formula 1 season la zo hnai lo mah se champion tur a chiang hnai a, Mercedes team boss Toto Wolff chuan an nau Lewis Hamilton chu driver champion ni thei tura a dinhmun a ṭhat tawk tawh thu a sawi.

Pathianni hian US Grand Prix an tlan dawn a, Mercedes driver Hamilton hian hnehna a chang a nih chuan a elpui Sebastian Vettel tan umphak theih a ni tawh dawn lo a, Britain tlangval hi a vawi nga nan a champion ang.

Mercedes team boss Toto Wolff chuan, "Ha­milton hi tun hma zawng ai khan a puitling tawh a, a bik takin tun hnaia a tlan dan en chuan midang tan hneh theih tur a ni lo. A champion ngei ka ring tawh a, chumi tur chuan kan pui dawn bawk a ni," tiin a sawi.

Tun hnai intlansiak hnuhnung pasarihah Hamilton hian ṭum ruk hnehna a chang thei a, amah hnaih bertu Vettel aiin point 67 zetin hma a hruai fal tawh. Tun season chhungin intlansiak pali a la awm dawn a, point 100 hmuh belh theih a la ni.