Salah-a'n Covid-19 a kai

Egypt tana inkhel tura feh chhuak Mohamed Salah chuan Covid-19 a kai tih hmuhchhuah a ni a, Premier League champion Liverpool tan chanchin lawmawm hriat tur a vang rih hle. 

Zirtawpni zan khan Egyptian Football Association (EFA) chuan thuchhuah siamin Salah hian Covid-19 a kai thu an puang a, natna erawh a lang chhuak lo thung. 

EFA hian tihchian nan Salah hi test an nei nawn leh ngat a, mahse an beisei ang result hmu thei loin Covid-19 a positive tih tho chu an result dawn a ni.

Egypt hian Inrinni zan khan Africa Cup of Nations qualification-ah Togo hmachhawnin 1-0 in an hneh a, Thawhlehni zan dar 9:30-ah AFCON qualifier khel lehin Togo hi an hmachhawn nawn leh ang. 

Salah-a'n Covid-19 a kai avangin Reds tan match hnih a khel thei dawn lo a, November 22 zana Leicester City an hmachhawn hunah Salah tel loin Reds an khelh a ngai dawn.

Liverpool hian November 25 zanah Champions League match khelin Atalanta an mikhual leh ang a, khualmuala 5-0 ngawta an sawp hnu laka Salah tel lo erawh an tuar lo tura ngaih a ni. 

Salah hian tun season-ah Liverpool tan inelna hrang hrangah match 13-a khel tawh a, goal 10 khungin assist vawi khat a nei thei - a ṭangkai tih a hriat.

Reds hian tun hnaiah hliam vangin an centre back first choice pahnih Virgil van Dijk leh Joe Gomez chu season tluan deuh thawin an chhawr thei dawn lo tih a chiang tawh a, right back Trent Alexander-Arnold dinhmun a la chiang lo bawk.

Hetihlai hian mid-fielder ṭha mi Thiago Alcântara chuan dam lam a pan tawh nia sawi a ni a, centre back anga chhawr ṭhin Fabinho-a'n training a zawm leh tawh bawk. 

Defender thar Kostas Tsimikas chu hliam vanga a inlan theih loh reng hnuin international break-ah Greece tan a inlan a, friendly match-a 2-1 a Cyprus an hnehna inkhelah a khel ṭha hle.

Kum 24 mi defender hi Liverpool a pan hnuah match hnihah chiah a la inlan a, hliam an ngah vanglai taka a dam hman avangin a tan chance a awm chho tura ngaih a ni.