Felder ngamtu Dos Anjos-a'n McGregor a cho

Brazilian fighter Rafael dos Anjos chuan nimin zing khan UFC Fight Night 183-ah Paul Felder chu split decision (47–48, 50–45, 50–45) hmangin a hneh a, Conor McGregor-a cho zui. 

Kum 32 mi fighter chuan lightweight division chu zau taka a inhawn thu sawiin, "Kei leh Conor hi kan inhmachhawn a ṭulin ka hria a ni," a ti a, Irish fighter a hlau lo. 

Rafael dos Anjos hian MMA-a fight vawi 43-a hmachhawn tawhah vawi 30 chakin vawi 13-a tlem a, Felder laka hnehna a chan hmaa a fight hmachhawn hnuhnung pangaah vawi khat chiah a chak.

Las Vegas khawpuia a hneh tak Felder hi kum 36 mi ve tho a ni a, Dos Anjos nena inhmachhawn tura tih hmasak zawk Islam Makhachev inhnuhdawh avanga inlan a ni - ni nga chiah inbuatsaihna hun a nei. 

McGregor chuan Dos Anjos chona hi chhangin, "Dustin Poirier ka hmachhawn phawt ang a, a dang pawh ka huam vek e," tiin twitter-ah a ziak a, Dos Anjos hmachhawn hreh lo mah se Poirier hmachhawn phawt a duh. 

Kum 2016 khan Dos Anjos leh McGregor hi inhmachhawn tura tih an lo ni tawh a, mahse hliam vangin Dos Anjos hi a inhnukdawk a ni.