I League khel turin Aizawl FC-in Kolkata an thleng

Covid-19 vanga I League khelh hun sawn a nih hnuah March thlatir aṭangin khelh chhunzawm a ni dawn. R. Dengṭhuama Hall kawtah nimin zing khan Aizawl FC thlahna hun hman a ni a, NorthEast aṭanga I League champion tawh awmchhun AFC hian inelna neihna tur Kolkata an thleng tawh.

I League hi nikum December 26-27 khan khelh a ni tawh a, amaherawhchu club ṭhenkhat player leh coaching staff zingah Covid-19 kai an awm avangin inelna neih chhunzawm theih a ni lo. Thla hnih an chawlh hnuah Kolkata-ah bawk chhunzawm a ni ang.

Bus leh Ambulance thar
Aizawl FC thlahna hun an hman rual hian club bus thar pahnih leh ambulance thar an tlangzarh a, Lengpui pan nan bus thar hi hman a ni nghal bawk. Bus pahnih hi National Thermal Power Corporation (NTPC) ten CSR Fund aṭanga cheng nuai 40 an rawn pek leh NECS-in cheng nuai li an thawh aṭanga cheng nuai 44 senga lei a ni.

Ambulance thar hi Assam chief minister ṭhin leh Union minister Sarbananda Sonowala-a'n Shipping Corporation of India CSR Fund kaltlanga a thlawna Aizawl FC a pek a ni a, cheng nuai 16 chuang man a ni. AIFF hnuai inelnaah hian ambulance a awm ngei ngei a ngai a, Aizawl FC-in I League match an khelh hian an hawh ṭhin. Covid-19 a reh chho a, home leh away-a inelna neih theih a nih hunah ambulance hi a hlu lehzual dawn.

Bus leh Ambulance thar hi Aizawl Board of Director (BoG) Lalrintluanga Sailo (MLA), H. Biakzaua (MLA), Er H. Lalzirliana (MLA), K. Laldawngliana (MLA), Dr K. Pachhunga (MLA) leh Dr Vanlalṭanpuia (MLA) ten a rualin an tlangzarh.

Aizawl FC neitu leh sports minister Robert Romawia Royte chuan, "Aizawl FC hi khawhar takin kum 10 zet kan lo enkawl tawh a, Mizo ṭhalaite hmakhua ngaia sum leh tha seng ve huam thawhpui tur kan mamawh em em laiin BoG thar duhawm tak tak kan nei hi a ropui ka ti takzet a ni," tiin a sawi.

AFC chu
Aizawl FC hian I League match khat an khelh tawhah Real Kashmir 3-2 in hneh lo mah se Mizorama I League nomawi rawn hawn turin an inringtawk. December thlaa match hmasa ber an khelh khan document fel loh avangin foreigner bakah an player thar lakte an chhawr thei lo a, chutichung chuan Real Kashmir nen an inkhel tawk hle.

Coach Yan Law chuan, "Player hi free agent (club nei lo) chu a la lak theih a, amaherawhchu ka squad neihah hian ka lungawi. I League-a tawnhriat nei ṭha foreigner ka nei a, Mizo player-te an ṭha bawk. Champion thei tur squad kan nei a, nomawi chawi ngei kan tum," tiin Vanglaini a hrilh.

Mizo club hian foreigner an nei hraw hle. Tlarhmaah I League-a goal khung thei pahnih Trinidad and Tobago striker Willis Deon Plaza leh Cameroonian striker Aser Pierrick Dipanda Dicka te an kawl a, tlarhnung ti chak turin defender lian ṭha Robert Primus (Trinidad and Tobago) an nei bawk.

Mizo club hian Asia quota pakhat an la thei a, Tajikistan international Bhaktiyor Qalandarov an lalut hnai niin sawi a awm bawk.

Squad ṭha
I League club-te foreigner-ah an innghat nasa ṭhin a, chutihrualin tualchhung player neih ṭhat a pawimawh. Aizawl FC-in nomawi an chawi ṭumin pawhin Mizo player-ten hmun pawimawh an chang a, Indian player dangte leh foreigner-te nen an inpawlh mawi hle.

Tun ṭumah pawh hian Uttar Pradesh keeper Anuj Kumar, Pune tlangval Nikhil Rajendra Mali leh Manipur midfielder Rinreithan Shaiza te state pawn player an kawl a, Mizo player ṭha an kawl khawm bawk.

Aizawl FC coach Yan Law chuan, "Kan squad a ṭhat avangin first eleven thlan pawh a har dawn a, postion tinah player thlak tur an awm. Inelna hmachhawn a châkawm tawh hle," tiin Vanglaini a hrilh a, assistant coach Lalruatliana Sailo pawhin an player neih dana a lungawi thu leh an fitness a ṭhat thu a sawi bawk.

Mizo club hian March 3, Ningani zan dar 7:30-ah Mohammedan SC an hmachhawn dawn a; Rajasthan (March 8), RoundGlass Punjab (March 11), Sudeva Delhi (March 15), Indian Arrows (March 20), Churchill Brothers (March 24), Kenkre (March 28), Gokulam Kerala (April 1), Trau (April 5), Neroca (April 9) leh Sreenidi Deccan (April 14) te an tum chhunzawm ang.

Thlirna Tawi
Round 1
December 26, 2021
Trau 0 - 0 Indian Arrows
Gokulam Kerala 1 - 0 Churchill Brothers
Rajasthan United 0 - 2 RoundGlass Punjab
December 27, 2021
Neroca 3 - 2 Sreenidi Deccan
Real Kashmir 3 - 2 Aizawl FC
Mohammedan 2 - 1 Sudeva Delhi FC

Round 2
March 3, Ningani
Sreenidi Deccan 2:00 PM Trau
Neroca 4:30 PM Gokulam Kerala
Aizawl FC 7:30 PM Mohammedan SC
March 4, Ningani
Sudeva Delhi 2:00 PM Indian Arrows
Real Kashmir 4:30 PM Kenre
RoundGlass Punjab 7:30 PM Churchill Brothers