Own goal hattrick siamtu Meikayla Moore!

New Zealand hmeichhe team defender Meikayla Moore chuan USA lakah own goal vawi thum a khung a, a team chu US lakah hian 5-0 ngawtin a mualpho pui.

Hmeichhe football-a ram leh ram inelna lar tak SheBelieves Cup-ah New Zealand hi inelna thlengtu USA nen Pathianni zan khan an inkhel a, Moore hian minute 5 leh 6-naah an lamah a tilut a, minute 36-naah an lamah bawk a ti goal leh bawk!

FA Women's Cham-pionship hmahruaitu Liverpool tana khel mek Moore hi minute 40-naah thlak zui a ni a, an lama goal thum a khung hnuah hian US tan Ashley Hatch leh Mallory Pugh ten khung ve lehin 5-0 in New Zealand an tlawm.

Thil mak danglam ve tak chu kum 25 mi Moore-i own goal hattrick hi a ke vei lam, ding lam leh lu hmanga khung a ni a, 'perfect hattrick' an tih ṭhin ang kha a ni!

SheBelieves Cup hi body United States Soccer Federation-in hmeichhe football team sawm bikte tana a buatsaih ṭhin a ni a, kuminah hian team pali telin, an inkhelh kual vek hnuah a sang ber chu champion tur an ni - inelna hi USA chuan a thleng.

Pathianni zan inkhel dangah Iceland chuan 2-1 in Czech Republic an hneh a, match hnih khelh tawhah point ruk hmuin hmahruaitu an ni mek.