Kan result a ṭhat avangin kan inringtawk - Tuchel

Chelsea boss Thomas Tuchel chuan Champions League last 16 first leg khel tura an inpeih thu a sawi a, Blues hian zanin dar 1:30-ah French champion Lille an mikhual ang.

Tuchel chuan, "Knockout match, cup match leh Champions League-ah kan khel ṭha ṭhin a, chuvang chuan zaninah pawh ṭha takin kan khel ang tih kan ring," tiin an inrintawk thu a sawi.

Chelsea hian season hmasa khan Champions League nomawi an chawi a, FA Cup-ah final an lut bawk - season hmasa aṭanga teh chuan German coach thusawi hi ṭawmpui mai a hahdamthlak.

Tun season-ah pawh Blues hian FA Cup-ah beisei tur nei tawh lo mah se League Cup final an lut tawh a, Champions League-ah a thiam 16 zingah an tel bawk.

A si ruk lain...
Chelsea hian tun season-ah Club World Cup nomawi an chawi fel leh der tawh a, Premier League-a an match hnuhnung berah 1-0 in Cyrstal Palace an hneh bawk - an phur vanglai tak a ni.

Selhurst Park-a an inkhelh ṭumin Blues hian an player neih ṭhat an chhawr thei lo nual a, mahse, Tuchel chuan Palace laka inlan lo Cesar Azpilicueta leh Callum Hudson-Odoi te chu an dam hman a rin thu a sawi.

Chelsea boss chuan, "Azpi leh Hudson-Odoi te zanina an inlan hman theih nan theihtawp kan chhuah. Azpi hian a ṭhalah hliam a nei a, Callum pawhin a ke artuiah na a nei," a ti a, inlan tir an tum thu sawi mah se bul ṭan chu a harsa mai thei.

Blues tan Mason Mount chu inlan lo tur chianga ngaih a ni a, tun hnaia form tak Hakim Ziyech-a'n bul a ṭan ngei dawn tihna a ni a, Palace laka 'bo' Romelu Lukaku aiah Timo Werner a lut a nih pawhin a mak lo ang.

Lille dinhmun
Season hmasa Ligue 1-ah Lille an champion a, tun season-ah erawh 11-na an ni mek - an league match hnuhnung paliah vawi khat chiah an chak a, Chelsea fans tam zawkin an zuam ang.

Chutihrual chuan zanina an inkhelhna tur hi Champions League a ni tih theihnghilh loh a ṭha a, group G-ah an tiatpui nia ngaih Red Bull Salzburg, Sevilla leh VfL Wolfsburg te nen an awm ho chunga group hmahruaitu ni thei an ni.

Chelsea tlarhnung tan Jonathan David theihnghilh loh a ṭha a, kum 22 mi forward hian Lille tan tun season-ah match 33 khelin goal 16 a khung tawh a, European club liante chil tiputtu a ni mek.

Kum 36 mi Burak Yilmaz hi upa deuh tawh mah se match 29-ah goal ruk leh assist panga a la neih theih avangin a la rintlak tih a hriat a, midfielder Renato Sanches leh defender Jose Fonte te pawh boruak sangah an talbuai lo ang.

Fimkhur takin aw!
Lille-in player nei pangngai viau mah se khaikhin a ralah chuan Chelsea an tluk lohzia bak hmuh tur a awm lo a, mahse, hei tak hi Chelsea tan chetsual theihna tur a ni - Tuchel pawhin a hai lo.

German coach chuan, "Lille laka dinhmun ṭha zawk anga midangin min thlirna hi kan ngaihtuah lutuk tur a ni lo," a ti a, a thiam 16 zinga tel phak hmachhawn tur an nih avangin fimkhur a ṭul thu a sawi.

Tuchel chuan, "Beiseina tihsan leh lutuk hi chetsual theihna a ni a, team lian lo zawk anga lang laka inkhelh hi a harsa thei - hei hi kan pawm chuan zalen leh ṭha zawk ni tura kan ke penna hmasa ber a ni thei ang," a ti.

Chelsea hian Pathianni zanah League Cup final Liverpool nen an khel zui dawn tih hriat telsak a ṭha a, Tuchel-a'n he inkhel tur thlir chung hian zaninah fing taka player a rem thiam a ṭul dawn.

UCL Last 16
First leg
February 15, Thawhlehni
Paris Saint-Germain 1 - 0 Real Madrid
PSG: Kylian Mbappe 90+4'
Sporting Lisbon 0 - 5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Rahee, Sterling 58'

February 16, Nilaini
RB Salzburg 1 - 1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0 - 2 Liverpool
LFC : Roberto Firmino 75'; Mohamed Salah 83'

Zanin Inkhel Tur
Chelsea 01:30 AM Lille
Villarreal 01:30 AM Juventus

February 23, Nilaini zan
Atletico Madrid 01:30 AM Manchester United
Benfica 01:30 AM Ajax

Second Leg
March 8, Thawhlehni zan
Bayern Munich 01:30 AM RB Salzburg
Liverpool 01:30 AM Inter Milan

March 9, Nilaini zan
Manchester City 01:30 AM Sporting Lisbon
Real Madrid 01:30 AM Paris Saint-Germain

March 15, Thawhlehni zan
Manchester United 01:30 AM Atletico Madrid
Ajax 01:30 AM Benfica

March 9, Nilaini zan
Juventus 01:30 AM Villarreal
Lille 01:30 AM Chelsea