Ranji Trophy-ah Mizoram leh Bihar an inhnehtawk

Mizoram chuan tun season Ranji Trophy-a an match hmasa berah Bihar an hmachhawn a, chak zawk an awm lo. Inelna hi February 17-20, 2022 chhung khan Jadavpur University Campus 2nd Ground, Kolkata-ah khelh a ni.

Bihar hi ṭhumvawrah an chak a, bat hmasak thlangin first innings-ah 686 runs tehmeuh an siam a, wicket nga chauh hloh mah se hnehna chang turin Mizoram innings hniha vawm out vek a ngaih avangin an duh tawk. Mizoramin first innings-ah 328 runs an siam pha a, second innings-ah 199/4 runs siam lehin an ṭang tluan.

Bihar an fimkhur sual
Bihar-in an bat hmasa a, ball thar hman laiin Mizoramin wicket thum chu an la mai. Amaherawhchu an khelhna hi flat pitch a ni a, ball a kal kawi loh avangin batter tan run siam a nuam.

Babul Kumar (229*) leh Sakibul Gani (341) te inkawp chu Mizoram bowler-ten vawm hlum an harsat. Bihar hian Mizoramin tawnhriat nei ṭha Taruwar Kohli leh Uday Kaul te an kawl avangin run siam an duh thawh.

Hemi bakah hian Bipin Saurabh-a'n half century a siam an nghak a, ni hnihna tea break zawhah pawh an la bat. An duh tawk meuh chuan 686 runs an siam a, wicket nga an hloh.

Kohli leh Uday
Mizoram tan local player an che ṭha lo a, Mizo tlangvalten run tam siam lo mah se Taruwar Kohli (151) leh Uday Kaul (96) te zarah mualphona an pumpelh. First innings-ah Mizoram hian 328 runs an siam.

Ranji Trophy-ah hian an inthlauhna 150 runs a tlin chuan Bihar lamin an 'follow on' tir theih a, rin lawk ang ngeiin Bihar-in Mizoram an bat nawn tir. Mizoram an bat nawn hian ni tawpna ber a ni tawh a, draw turin dam tluan a ngai.

Mizoram tan Taruwar Kohli bawk a rawn che ṭha a, 101 runs an siam. Kohli hian innings pahnihah century a siam ve ve a, team pahnih an inhnehtawk nan a che ṭha hle. Uday Kaul pawhin 56 runs a rawn siam ve bawk a, Bihar-in Mizoram an vawm hlum zo hman lo a, an inhnehtawk.

Point pek dan
Ranji Trophy-ah hian hnehna chanin point ruk a hmuh theih a, innings khat emaw 10 wicket-a hnehna an chan chuan bonus point awm lehin match khatah point sarih a hmuh theih. An inhnehtawk a nih erawh chuan first innings-a che ṭha zawkin point thum an hmu a, pakhat zawkin point khat an hmu thung.

Ruahsur leh chhan dang vanga inkhelh tluan theih loh a nih erawh chuan point khat an insem. Chak lo tan erawh point a awm lo thung. Bihar hian first innings-ah run an siam tam zawk avangin point thum an hmu a, Mizoramin point khat an hmu thung.

Plate group inkhel dangah Manipur-in Arunachal Pradesh chu innings leh 25 runs in an sawp a, point sarih an hmu. Nagaland-in Sikkim wicket rukin an hneh a, point ruk an hmu ve bawk. Group khat aṭang hian team pakhat chauh tlang tur a ni.

Hmabak chu
Plate group-ah team paruk an awm a, team tinin match thum ṭheuh an khel dawn. Team ṭhat dan mila fixture hi an siam avangin Mizoramin an elpui tawk tura ngaih Sikkim leh Arunachal Pradesh te an hmachhawn dawn lo.

Mizoram hian February 24-27, 2022 hian Manipur nen an inkhel ang a, match tawp berah Nagaland nen March 3-6, 2022 hian Eden Garden-ah an khel leh ang.

Thlirna Tawi
Mizoram leh Bihar inhnehtawk
• Ṭhumvawrah Bihar an chak a, vuak hmasak an thlang
• First innings-ah Bihar an chak zawk avangin 3 pts an hmu
• Mizoramin Bihar an chelh avangin 1 pt an hmu thung

First Innings
Bihar 686/5dec
Babul Kumar 229*
Sakibul Gani 341

Iqbal Abdulla 136/2
Taruwar Kohli 49/1

Mizoram 328
Taruwar Kohli 151
Uday Kaul 96

Sachin Kumar 67/4
Ashutosh Aman 46/3

Second Innings
Mizoram 199/4
Taruwar Kohli 101
Uday Kaul 56

Abhijeet Saket 29/3
Sachin Kumar 26/1