Wilshere-a'n club thar a nei

Jack Wilshere chuan thla riat chhung club nei loa a awm hnuah Danish club AGF Aarhus a zawm, an inrem dan chuan tun season Danish Superliga tawp thleng a khel ang; a hnu lam chu inbiak ṭhat leh tura tih a ni.

Talent nei ṭha mah se Wilshere hi hliamin a tibuai a, a vanglai a rei lo hle. Tun dinhmunah kum 30 mi chauh a la ni, club nei loa a awm lai hian a chawr chhuahna Arsenal-ah training a zawm reng tho a, inkhel loin awm rei mah se match khel turin a inpeih.

England international hlui Wilshere chuan, "Hun harsa ka tawn mek paltlang tur hian bul ṭanna tur ka mamawh a, chumi atan chuan AGF hian hun ṭha min siamsak. Remchang ka nei hi ka lawm a, ka theihtawp ka chhuah ngei ang.

"Arsenal training ka zawm khan thil tum mumal tak ka nei, kum 2022 chhung ngeia club khelhna tur hmuh kha ka tum. Tunah chuan ka thil tum hmasa chu a hlawhtling," tiin a sawi a, inkhelh chawlhsan mai chu a la tum lo hle.

Gunners chhul chhuak Wilshere hian 2018 khan Emirates Stadium a chhuahsan a, a chhuah chhan hi hliam leh harsatna hrang hrang vanga a inkhelh tam loh vang a ni - a hnu lamah pawh a buai chhunzawm, match 36 bak a la khel lo a ni.