NBA All-Star ; A thiam rual zinga langsar ber Stephen Curry

Basketball khel phak zinga a thiamzual ten NBA an khel ṭhin a, a thiam rual zinga hmuhnawm leh thiam fal thlan chhuah ten All-Star Game an khelh leh ṭhin, thlitfim tawh ho zingah pawh Stephen Curry a langsar ber.

Nimin zing NBA All-Star 2022 inkhelah Team LeBron chuan Team Durant lakah 163-160 in hnehna an chang a, Golden State Warriors star Curry chuan chi hrang hrangin 3-points record pathum a siam!

Team LeBron lamin rinrawla an neih Curry hian minute 36 a khelh chhungin point 50 a nei hman. Record pathum siamin; 3-points vawi 16 a vawm lut a, quarter khatah 3-points vawi ruk a nei hmanin, chawlhlawk hmain 3-points vawi riat a nei hman bawk.

Record duhawm pathum siam mah se, match khata point nei hnem ber record erawh a tluk ta lo. Kum 2017 All-Star an khelh ṭum khan Anthony Davis chuan point 52 neiin record hi a lo siam tawh a, khum thei an la awm lo.

All-Star MVP Award chu Curry kutah hlan a ni. Award hi Los Angeles Lakers legend Kobe Bryant hming chawia tih a ni tawh, a hming atan 'Kobe Bryant Trophy' tih a ni, a zawna a vawi nga nan Team LeBron hian All-Star Game-ah hnehna an chang.

All-Star Game hi NBA match pangngai nen an khelh dan a inang chiah lo, inven tuma in beih leh ball inchuh vak ang kha a awm meuh lo. Entute tana a hmuhnawm tura khelh a ni a, player ṭhaten an thiam thil an lantirna chu an ngai pawimawh.