Elland Road-ah Man United an dingchang

Manchester United-in Pathianni zan khan an hmelma Leeds United khelmual Elland Road an luhchhuah a, 4-2 in hnehna an chang. Ralf Rangnick-a hote hian point thum hlu tak an hlawh chhuah avangin palinaah an awm chhhunzawm a, an chak dan avangin inrintawkna an neih phah bawk ang.

First half-ah Man United-in Harry Maguire leh Bruno Fernandes te hmangin hma an hruai a, awlsam taka chak turah a ngaih theih. Amaherawhchu second half-ah Leeds-in minute hnih chhung lekin Rodrigo Moreno leh Raphinha hmangin siphurh an sut a, inkhel boruak a dang. Mikhual team tan substitute Fred leh Anthony Elanga ten an khung belh a, Man United-in point thum hlu tak an hlawh chhuak.

Captain Maguire
Man United-in khelmual chhungah result ṭha neih an harsat avangin sawiselna an tawk nasa a, captain Maguire phei chu social media lamah fiamthu thawh nan an hmang nasa. Hetah hian a la tawp lo, Maguire hi Cristiano Ronaldo nen thuneihna an inchuh tih thuthang a awm a, Portuguese forward hi Rangnick-a'n captain atan a ruat dawn tih thlenga ziak pawh an awm.

Amaherawhchu inkhelh hmain German manager Rangnick-a'n thuthang mai mai a nih thu a sawi a, Maguire chu captain a nih thu a sawi. Khelmual chhungah Maguire-a'n amah seltute chhangletin Luke Shaw corner kick chu minute 34-naah a tauh goal a, Man United-in tun season-a corner kick aṭanga an khung hmasa ber a ni.

Man United an khel ṭha chhunzawm a, first half injury time-ah team goal an khung. Victor Lindelof-a'n midfield chet dan tura mawia a khalh chhuah hnuah Jadon Sancho tan a pe a, English winger hian cross ball duhthusam petin Fernandes-a'n a tauh goal.

Boruak a sang
Marcelo Bielsa hoten Old Trafford-a goal nga zet an chhuah ṭum pawhin hun tawp thlengin an attack. Minute 53-na lekah Rodrigo chuan vei lam kil aṭanga cross a tum chu goal-ah a lut daih a, minute khat hnuah Raphinha hmangin siphurh an sut fel. Brazilian winger Raphinha goal hi Man United player hlui Daniel James siamsak a ni.

Elland Road inkhel boruak a nung ṭha a, second half-a talbuai ṭhin Man United an hlauthawng. Rangnick-a'n substitution awmze nei a siam a, minute 67-naah Fred leh Anthony Elanga te luhtirin Paul Pogba leh Jesse Lingard te aiah a luhtir.

Minute 70-nah Fred leh Sancho ten wall pass hmanga Leeds tlarhnung an ṭhiah hnuin Brazilian midfielder hian ṭha zetin a khung. Fred ruala lut Elanga-a'n a chance ṭha neih hmasak khung lo mah se minute 88-naah Fernandes-a hnathawh ṭhat sengin chak nemnghetna goal a khung.

Man United hian February 23, Nilaini zanah Atletico Madrid an mikhual dawn a, Champions League last 16 zawh hian Premier League-ah Watford nen February 26, Inrinni zanah an inkhel leh dawn.