UEFA Nations League: Portugal hnehtu France-in semifinal an lut

World champion France-in Inrinni zan khan European champion Portugal 1-0 in an hneh a, League A group 3 aṭangin Nations League finals an lut. Goal awmchhun hi minute 53-naa N'Golo Kante khung a ni. 

Nations League finals nakkum October 6-10, 2021-ah khelh a ni chauh dawn a, inelna thlengtu tur pawh tihchian a la awm lo. Finals-ah team pali an tel ang a, semifinal leh final a awm ang.

France leh Portugal te hi an inhma-chhawn hmasak ṭumin goal awm loin an inhnehtawk a, hemi a nih avang hian Les Bleus tan khualmual Estadio da Luz-ah hnehna chan ngei a pawimawh.

Portugal coach Fernando Santos-a'n captain Cristiano Ronaldo bul a ṭantir a, Juventus forward hi ṭan phat aṭangin a hmuhnawm. Amaherawhchu ram tana goal 102 zet khungtu Ronaldo hian France lakah goal a la khung lo a, tun ṭumah pawh hian Hugo Lloris venah a pet goal thei lo.

France forward Anthony Martial-a'n first half-ah crossbar a tauh per a, Manchester United forward goal khung tur hi Rui Patricio-a'n a dang bawk. 

Hun chanve hmalamah goal a lut lo a, second half-ah erawh a lut hma. Minute 53-naah Chelsea midfielder N'Golo Kante-a'n a thawhrim rah sengin goal awmchhun a khung. 

French midfielder Adrien Rabiot-a ball pet chu keeper Rui Patricio-a'n dang mah se a per nang hmasa bertu Kante-a'n a pet goal a, ram tana a goal vawi hnih khungna chauh a ni.

Portugal-in siphurh sut tumin an nawr na a, France-in away goal an neih avangin goal hnih tal khung an mamawh. Joao Moutinho ball pet keeper Lloris-a'n a dansak a, Didier Deschamps-a hote an ṭangtluan.

Portugal-in head to head-ah France an ngam loh avangin an umpha thei tawh lo a, Nations League champion lai an tla. Portugal coach Fernando Santos chuan, "Second half-ah kan khel ṭha lehzual. Chutihrualin team pahnih danglamna chu goal khat a ni. A bakah chuan kan khel ṭha a, chance pawh kan insiam hnem. Goal li khung theihna tur hun ṭha kan nei a, kan khung tlat lo," tiin an vanduai thu a sawi.

France coach Didier Deschamps chuan, "Kan khingpui ṭhat dan aṭanga tehin tun hnaia kan khelh ṭhat ber a ni hial ang. Hun pawimawhah ka player-te chak duhna thinlung nen an rawn pen chhuak a, ka lawm takzet a ni," tiin a sawi. Portugal nen hian Finland an hneh loh ṭuma bul ṭan lo leh khel ṭha lo Kante leh Paul Pogba te an khel tluan a ni.

League A group 3 inkhel dangah Sweden-in an mualah Croatia 2-1 in an hneh a, League B-a tla thla tur a la hriat loh. November 17, Thawhlehni zan hian Croatia-in Portugal an mikhual ang a, France-in Sweden an hmachhawn ve bawk ang.