Dybala leh Bonucci dinhmun a chiang lo

Zanin dar 1:30 hian Champions League last 16 first leg khel turin Juventus chu Villarreal mualah an lenglut dawn. Italian club leh Spanish club hi tun hmain an la intawng ngai lo, an inkhelh vawi khatna tur a ni dawn.

Old Lady hian an player pawimawh pahnih Paulo Dybala leh Leonardo Bonucci te chu hliam vangin a chhawr thei lo mai thei, nimin tlai thleng kha chuan an dinhmun hi sawi chian theih a la ni lo.

Sky Sport Italia-in an tarlan dan chuan Juve player pahnih hi an inlan dawn lo. Dybala awm lo mah se thlasik bazara an lei Dusan Vlahovic chu UCL squad-ah ziah luh a ni tawh a, goal khung lamah chuan harsatna an tawk lo tura ngaih a ni.

Tlarhnung erawh an buai leh deuh mai thei. Massimiliano Allegri-a'n tlarhnung remphui a harsat rih a, tawnhriat nei ṭha Bonucci a awm loh chuan a laiah Matthijs de Ligt leh Alex Sandro an inkawp leh a rinawm.

La Liga lama parukna Villarreal hian an match hnuhnung berah goal li an khung, goal khung an harsat loh avangin tlarhnung phui lo Turin club tan inven uluk a ngai dawn. An inveng seng ang em tih chu zaninah a chiang dawn.

Tun season aṭangin UCL-ah away goal rule tih tawp a ni a, khualmuala goal khungin awmzia a nei thui ta lo. Allegri naute hian Allianz Stadium lama second leg khelh tur thlir lawk chungin, mahni inveng taka an khel a nih pawhin a mak lo ang.